中醫為確診者綫上義診 免費贈醫施藥齊抗疫

最近香港疫情嚴峻，人心惶惶，黛安聽聞唔少中醫都想出一分力紓緩公院嘅壓力，同時幫助正等待安排入院嘅確診者。例如土瓜灣嘅回春堂中醫診所就貼出告示，話診所負責人唐文儀醫師唔忍心見到部分確診者孤立無援，所以決定為感染Omicron、正等待入院嘅病人提供綫上視頻義診服務，仲會免費送針對性治療中藥兩包，病人可派健康嘅親友到診所代領中藥。有需要嘅人士可致電診所登記安排義診，電話︰23342472。

另外，浸大中醫藥學院臨床部亦出咗通告，話浸大中醫一直有提供網上診症服務，有見疫情嚴重，由即日起特別為新冠病毒感染者提供免費諮詢、診症、中藥、代煎藥及快遞服務，浸大中醫師會透過WhatsApp提供網上診症，求診者需要喺WhatsApp視像出示感染證明，如西醫證明文件、檢測報告、SMS檢測結果、快速檢測結果等，若未能提供，則需以正價收費。詳情可瀏覽「香港浸會大學中醫藥診所」fb專頁。