「百變小櫻Clear咭」特別版八達通 銀包客戶即日起可預定

《百變小櫻Magic咭》係好多人嘅集體回憶，之後嘅續集《百變小櫻Clear咭》同樣好受歡迎。黛安收到風，八達通即將推出「百變小櫻Clear咭特別版八達通」，粉絲不容錯過呀。

呢款成人八達通印有小櫻嘅經典粉紅色造型，背景畫有魔法陣，設計充滿少女心，小櫻手上攞住嘅夢之杖亦有乾坤，因為呢款卡特別採用LED設計，當大家拎去讀卡時，夢之杖上嘅星星就會亮燈，好似小櫻真係施展魔法咁，黛安都好想買啊。

公關姊妹話，八達通銀包客戶即日起至下周三（19日）下午5時前，可透過八達通App預訂呢款八達通，每款售$128，每位客戶限購3張，入面唔包按金及儲值額，詳情可瀏覽八達通官網www.octopus.com.hk。