上水廣場 × 江大叔「春の開運祭」 3大開運打卡熱點

台灣人氣插畫師Amber設計嘅多肉人物「江大叔」，造型可愛又搞笑，黛安知道，Landmark North上水廣場下星期六（15日）至2月28日就會聯乘「江大叔」，呈獻「春の開運祭」，向大家送上新春「大叔的愛」。

公關姊妹話，商場中庭將打造3大開運場景，包括巨型江大叔招財貓坐鎮嘅「招財貓開運神社」，仲有帶來甜蜜桃花運嘅「情迷『桃』花園」，及祝大家食極唔肥、無憂無慮嘅「有求必應大吉寺」。大吉寺附近更有「財源滾滾大叔派利市」免觸式體感遊戲，攞到指定積分仲可以獲賀年揮春㖭。

商場2樓設有「開運江大叔挑戰站」，準備咗4大主題遊戲畀大家玩；場內仲有「虎年行運夾公仔機」，好運嘅有機會夾走大叔虎年造型公仔㗎。至於商場5樓戶外嘅「晴空花園」就會化身多個日本名勝景點，即使去唔到日本，都可以止下旅行癮。

活動期間消費滿指定金額或憑指定The Point會員積分，仲可換領「玩轉虎年」利市封同江大叔老虎造型咕臣，名額有限，換完即止，粉絲萬勿錯過啊。