希慎廣場蜘蛛俠主題展 Mirror成員設計別注版

黛安同好多Marvel迷都好期待下周三上映嘅《蜘蛛俠︰不戰無歸》，希慎廣場就同Marvel迷好熟悉嘅Hot Toys合作，即日起推出電影主題展，等大家未睇戲先興奮！

展覽會還原奇異博士打開多元宇宙一幕，每日下午仲有每小時音樂光效滙演。去到中庭，仲有金屬發光嘅蜘蛛俠巨型標誌，場內亦首次展出一系列蜘蛛俠同奇異博士嘅Hot Toys！期間限定店仲會賣全球首發、電影期間限定嘅蜘蛛俠1︰6比例嘅珍藏人偶，記得帶定銀彈掃貨！

展覽仲同MIRROR合作，Anson Kong、Lokman、Alton會設計經典蜘蛛俠漫畫造型人偶，配合獨有場景、Hologram影像展出。另外，只要下載Lee Gardens手機App登記做會員，就可以同蜘蛛俠一齊化解綠魔嘅炸彈危機，贏取特別版海報；消費滿指定金額仲有紀念品送，千祈唔好錯過！