利東街變冬日聖誕村 指定日子有飄雪活動

今年聖誕有好多靚靚燈飾，例如灣仔利東街將化身璀璨閃亮大道，即日起至明年1月2日，呢度會上演以迪士尼為主題嘅炫彩燈飾派對。利東街中庭設有一組5米高、以迪士尼公主為主題嘅3D幻彩裝置，每晚5時炫彩燈飾就會亮起，好似舞會現場般，加埋10米高嘅巨型聖誕樹，猶如童話故事咁浪漫。

黛安知道，現場每晚6點至10點仲會上演光影音樂騷；利東街打造成集美食、藝術、慈善嘅冬日聖誕村，最啱約埋親朋好友一齊去啦。今個周末（27、28日）起，喺指定日子場內會增設飄雪活動，令冬日氣氛更濃厚；活動期間只要打卡上載照片至ig及fb時，hashtag #LTAXmas2021，就有機會贏取香港寬頻12個月Disney+及1000M家居寬頻服務計劃。

另外，小粉絲可參加以聖誕為主題嘅網上填色比賽，冠軍可獲利東街$1,000現金消費禮券㗎，想知更多活動詳情，記得留意利東街社交媒體及網站。