75歲吳光正 奪網球公開賽雙料冠軍

新冠疫情緩和，唔少國際及本地大型運動賽事如馬拉松、渡海泳及網球賽等相繼復辦，的確係運動發燒友嘅佳音。黛安知道，城中名人、九龍倉集團首席顧問吳光正，熱愛運動，網球、籃球、跑步、高爾夫球、游泳、潛水及滑雪等等，通通難佢唔到。

近半年可能未能出門嘅關係，喺訓練有功下，佢除咗早前喺香港國際超壯年公開賽2021「70歲或以上男子組」單、雙打賽勝出外，近日更喺香港國際先進網球公開賽2021，奪得75歲或以上男子組雙、單打雙料冠軍，頻頻攞獎。公關姊妹話，佢4度掄元全靠勤練有功，據聞佢每日都打網球及游泳鍛練身體，毅力過人，見到佢身形健碩，狀態一流，邊個估到佢已屆75之齡？！