麥當勞化身MIRROR主題店 12子各有專屬餐廳巴士

黛安收到風，為慶祝MIRROR成軍3周年，即日起一連四星期，金鐘海富中心嘅麥當勞將化身MIRROR期間限定主題店，輪流展出12位成員嘅宣傳品及1︰1人形紙板公仔，鏡粉可一次過同偶像合照，拍攝區每日早上8時至晚上10時開放；而主題店每日（公眾假期除外）下午3時起，更會免費派發印有MIRROR同麥當勞Logo嘅限量版氣球，送完即止。

全港超過240間麥當勞亦會變為MIRROR 12位成員嘅個人專屬餐廳，掛上其肖像嘅宣傳旗，喺麥當勞fb專頁就可查看偶像嘅專屬餐廳位置。麥當勞仲會安排110架MIRROR成員專屬巴士行走各區，每個成員都有自己嘅獨立巴士車身廣告同大頭相，鏡粉見到必定好開心。

另外，即日起麥當勞App用戶可憑唔同指定電子優惠券購買麥炸雞，更可獲隨機派發鏡仔卡，全套16款鏡仔卡會分4星期推出，今個星期先由姜濤、Stanley和Tiger打頭陣，數量有限，送完即止。