新世界「80日環遊世界」拼色口罩 9款設計

最近新世界發展又出新口罩，黛安知道，今次新出嘅「80日環遊世界」拼色口罩系列，以世界旅遊勝地做靈感，共有9款唔同設計。即日起至今個月26日，喺尖沙咀K11 Art Mall口罩期間限定店可以買到喇。

限定店首次推出「80日環遊世界」拼色口罩禮盒裝，大家可以喺店內自選全套9款、每款5片裝嘅拼色口罩禮盒，買禮盒仲會免費附送一套9款嘅世界名勝明信片，售價$200，啱晒同朋友開心Share。

另外，買5片盒裝口罩亦有優惠，現時1盒售$22，買3盒只需$60。

店內仲特設比賽，等大家分享最難忘或最期待嘅旅遊景點及行程，當中最具原創性和趣味性嘅參賽者，有機會獲得「80日環遊世界」拼色口罩禮盒裝1盒㗎。