LINE FRIENDS宣揚環保 登陸如心廣場

鍾意LINE FRIENDS嘅朋友留意喇，荃灣如心廣場即日起至20日，同LINE FRIENDS合作宣揚環保訊息，場內有售多款跨界別合作嘅環保生活單品，更設有塗鴉牆，支持成為綠色好友，即可獲BROWN & FRIENDS多款小禮物，千祈唔好錯過。

活動以「MAKE EVERY DAY EARTH DAY」為主題，如心廣場二期請咗香港藝術家Pantone C合作，用啤酒、乳酪與青苔製成嘅「青苔漆」做顏料，打造與別不同嘅生態「承諾牆」。巨大奪目嘅標語，最啱姊妹打卡吸LIKE，綠色大使BROWN、CONY與SALLY仲會親身宣揚環保小貼士。

黛安知道，今次活動目標係召集1,000名官方認證嘅「BROWN & FRIENDS綠色好友」。只要喺6月13、14及20日，下午2點至晚上8點，去到塗鴉牆宣誓，並將現場打卡照，連同指定活動標籤公開分享到個人社交媒體，並標註3位好友，就可獲獎勵，包括多用途文件夾、證件繩、紀念襟章，及可選購綠色生活單品嘅購物禮券，名額有限，先到先得。