歎毛蟹清酒芝士蛋糕 來一田吃遍北海道

黛安今年冬天無得去北海道度假，幸好一田搞咗個「一田x JETRO北海道食品祭」，喺沙田、旺角、葵芳同北角嘅4間一田超市，除咗搜羅好多北海道美食，仲設置2.5米高嘅北海道名物巨型裝置，長腳蟹同拉麵仿真雪雕，以及2米高嘅雪人畀大家打卡，打造成北海道雪祭慶典咁，就算留港都可以感受到當地嘅節日氣氛啦。

今次食品祭帶來北海道代表螃蟹之一「毛蟹」來港，每隻只售$268，啱晒一眾「蟹迷」掃貨返屋企打邊爐，配埋肥美嘅2L帶子、地道北海道薯仔同洋蔥，以及北海道小樽果釀啤酒，真係大滿足嘅一餐。

公關姊妹仲話，可以試埋北海道最北酒藏的「國稀酒造」清酒，尤其係限定嘅國稀純米吟釀酒，同埋喺日本清酒比賽Kura Master 2020獲「TOP5」榮譽嘅北の錦純米大吟釀，都係一試難忘嘅經典。飯後歎埋富良野雪白芝士蛋糕，享受Seicomart便利店期間限定嘅北海道蜜瓜味啫喱，自然可一解「鄉愁」啦。