劇集《愛美麗狂想曲》的一眾演員李佳芯、何廣沛、陳瀅、譚凱琪和楊詩敏（蝦頭）接受《Tiger's Talk》訪問，何廣沛笑言角色主力追求李佳芯，而譚凱琪扮演鄉下來香港工作的女生，原本有個養豬的未婚夫，後來悔婚，在陳瀅的介紹下加入她工作的公關公司，然後跟蝦頭成為閨密。眾人於節目中大談愛情觀，又以「第三者」作為話題，言無不盡。
（網上圖片）
黃宗澤同蝦頭有「景轟」?
主持人林盛斌（Bob）和伍詠薇即場爆料，指原來黃宗澤（Bosco）跟蝦頭交往甚密，蝦頭連忙解釋：「大家都係同事朋友一齊玩，我知Bosco好鍾意我呢種類型，成日有意無意提起我，佢鍾意食蝦頭，識食一定係食蝦頭。」
（Bosco IG）
沒想到陳瀅即時拎起電話打畀Bosco，Bob即場嚴刑逼供追問Bosco是否對蝦頭有意，Bosco笑言：「我直情係迷戀佢十年啦，佢起勢用電眼電我，最慘係電我嗰時永世唔著低胸。蝦頭出晒名身材好嘛，我成日喺TVB拍嘢時，廠外見到佢，次次都著得好密實，真係谷鬼氣！如果蝦頭可以著住三點式喺我屋企客廳，我真係會忍唔住。（有咩同蝦頭講？）蝦頭，I LOVE YOU！」蝦頭笑指Bosco沒有福氣，事關她過往的性感打扮場口，全部都是跟Bob合作。
（Bosco IG）
何廣沛恨「試」伍姑娘
Bob問到在場的唯一男性嘉賓何廣沛，如果要在四位女演員及伍詠薇之間選女朋友，會如何選擇？何廣沛即時選伍詠薇：「拍過幾次拖，要揀就揀啲未試過嘅類型，夠大反差！」伍詠薇將手交給何廣沛，何廣沛即時借位錫錫她的玉手，伍詠薇見狀叫他獻吻，沒想到何廣沛都夠敢把頭靠近，伍詠薇說：「嘩，你真係夠膽呀喎，衰仔吖！」被問到如果瘋狂一次，會選蝦頭還是伍詠薇，何廣沛說：「WHY NOT BOTH？」
李佳芯容忍愛情有污點
提到「小三」話題，李佳芯笑言自己入行經常被安排演小三，不過私底下就沒有經歷過，反而試過男友一腳踏兩船，她說：「我對感情好無安全感，細個同個男仔拍拖，一齊冇耐佢就去外國讀書，一走就走四至五年，我就冇同其他人拍拖，佢亦聲稱自己冇拍拖，返嚟之後我哋一齊番，不過憑女仔直覺，我就有啲懷疑。」李佳芯後來透過社交平台發現有一個女仔拍下消防員男友的鎖匙扣，並留言答謝男友陪伴她，所以立即分手，她說：「因為我太無安全感，點解要呃我咁耐？（如果佢求復合？）細個唔識，以前係有少少大話都唔得要分開，覺得個愛情已經有污點，反而而家年紀唔同，心態唔同，會諗佢係咪真係有咩原因，或者自己係咪冇時間陪佢。」
何廣沛戴半頂綠帽
何廣沛分享自己慘被派帽事件，發生在十幾年前在外國讀書的日子，他說：「當時同女朋友分手後一直都藕斷絲連，冇乜所謂，當好似未一齊之前咁曖昧。有日放學返屋企，發現樓下停車場架車有兩個人頭郁下郁下，就見到其中一個就係我前女友，另一個就係我同房室友，我即刻黑晒面，真係幾難受，不過嗰個已經分咗手，我係連嘈嘅資格都冇。」
在劇中何廣沛跟李佳芯是發展姊弟戀，問到大家現實生活中能否接受姊弟戀。陳瀅表示可以接受比她小十歲至比她大十歲的男生，她笑言：「如果好似三哥苗僑偉咁，我得呀！我試過有次同三嫂（戚美珍）講唔好意思，借十分鐘我，我今日要媾一媾你老公，佢話隨便。」
蝦頭自爆受小鮮肉歡迎
蝦頭表示要建立一段關係，互相溝通非常重要，對於她而言，小鮮肉可以，不過玩法不同，她笑言：「好多小鮮肉好鍾意我呢D姐姐，所以話每一個人都有市場。」譚凱琪直言未能接受姊弟戀，接受不到身旁帶住個弟弟出街，她說：「我想我身邊嘅人係有人生閱歷，可以教我嘢，令我可以仰慕佢。（老公係咁？）當然係有呢一種，教到我嘢嘅人，特別會覺得吸引。」
伍詠薇「忘我」投入愛情
伍詠薇非常同意這一點，她認為大部分女性都會被男士的才華所吸引，提到她的第一段婚姻，對方比她大足足31年，伍詠薇說：「外界以為我戀父，其實我唔係，當年我21歲，雖然佢大我31年，但外表頂多似40幾歲，佢有才華同有錢，好有男人嘅感覺，佢好叻，單單演講幾句，已經迷住我，我要嫁呢個人，大部分女人都鍾意才華嘅男人，當你鍾意嘅時候都已經唔記得咗佢幾多歲啦！」
（↓點擊圖片放大↓）
- {{hket:inline-image name="39e1a4df-7079-4d0c-871e-4bc4f541ad8f.jpg"}}{{/hket:inline-image}}
- {{hket:inline-image name="YUS_5705.JPG"}}{{/hket:inline-image}}
- {{hket:inline-image name="YUS_5712.JPG"}}{{/hket:inline-image}}
- {{hket:inline-image name="YUS_5727.JPG"}}{{/hket:inline-image}}
- {{hket:inline-image name="YUS_5839.JPG"}}{{/hket:inline-image}}
- {{hket:inline-image name="YUS_5804.JPG"}}{{/hket:inline-image}}
- {{hket:inline-image name="YUS_5774.JPG"}}{{/hket:inline-image}}
- {{hket:inline-image name="YUS_5778.JPG"}}{{/hket:inline-image}}
- {{hket:inline-image name="YUS_5800.JPG"}}{{/hket:inline-image}}
- {{hket:inline-image name="YUS_5861.JPG"}}{{/hket:inline-image}}
- {{hket:inline-image name="YUS_5866.JPG"}}{{/hket:inline-image}}
- {{hket:inline-image name="72299815_177917946708766_3291331929082500296_n.jpg"}}{{/hket:inline-image}}
- {{hket:inline-image name="71774926_193392791686086_1226691338673384059_n.jpg"}}{{/hket:inline-image}}
撰文：黃蘊姿