屈臣氏全球微笑行動 籌款助兔唇兒童重拾笑容

全球最大嘅國際保健美容零售商屈臣氏集團，唔經唔覺已成立180周年，黛安知道，屈臣氏為慶祝盛事，今年將繼續「微笑行動」嘅全球籌款，為俗稱「兔唇兒」嘅唇顎裂兒童提供免費修復手術，幫佢哋重拾微笑。同時宣布會成立「微笑社區」，目標係喺明年3月前透過收集微笑相片，累積180萬微笑指數。大家記得上傳相片至projectlol.hk網頁，成為「微笑社區」嘅一分子呀！

屈臣氏集團董事總經理黎啟明同黛安分享，集團成立初期，已致力為貧苦大眾贈醫施藥，仲創立咗首個醫學院獎學金，為社會培育人才，連國父孫中山都係獎學金嘅得主之一。

時至今日，集團喺全球27個市場經營緊12個品牌，合共1.6萬間店舖，聘用僱員超過14萬人。今年疫情肆虐全球，集團更推動數碼轉型，提升全球1.4億會員顧客喺綫上同綫下嘅購物體驗。集團一直秉持嘅目標，就係致力令每位顧客會心微笑。集團深信微笑會帶來深遠嘅影響，不但可促進個人精神健康，仲可以為身邊嘅人帶嚟正能量！