噚日 (11月19日）係無綫一年一度「萬千星輝賀台慶」大日子，全台藝員盡出，個個都悉心打扮，目不暇給，都唔知應該將雙眼焦點擺喺邊！
依照慣例，每年都會安排小生花旦一Pair Pair咁入場，而今年馬國明就同「契妹」唐詩詠撓手入場。馬國明同唐詩詠傳緋聞多年，粉絲一直都覺得佢哋非常合襯，加上二人形象正面，大家都勁Like呢對緋聞情侶。不過今年就竟然有粉絲有「投訴」！
二人傳緋聞多年。（東星娛樂）
今年6月，有傳媒影到馬國明到訪湯洛雯屋企，消息傳出後，兩人火速喺IG上載照片承認戀情。而上載的內容亦相同，一向鍾情獨角獸公仔的靚湯，公開的照片中有一隻馬及一隻獨角獸，代表住馬明和自己，兩人一致留言「謝謝關心」承認蜜運中。隨即獲得大家一致祝福，大讚郎才女貌！
一個字，襯！（東星娛樂）
而噚晚大會梗係唔會安排馬明同靚湯一齊入場啦，於是就有粉絲「投訴」，「馬生應該要拖靚湯手出場」。兩人喺鏡頭前表現「冷漠」，引發粉絲們嘅無限幻想，更加偵探上身懷疑二人嗌交、零交流，指二人雖然企得好近，但馬明寧願同靚湯身旁嘅楊明傾偈，「搞乜嘢馬明逢女朋友都唔理，唔知係咪嬲咗靚湯」、「同靚湯分别企上下層，都好似冇乜眼神交流……唔多熟咁」
網民睇電視再加啲幻想力……（影片截圖）
頭撼頭？（影片截圖）
不過網上有騷後片段流出，原來二人喺鏡頭後表現親密！馬明同靚湯旁若無人咁交頭接耳，男方仲低頭疑似為靚湯整理裙襬。之後，二人眼神一致，對住鏡頭微笑，好有默契咁手拖手返入後台，靚湯更加風騷舉V，真係令人睇到都覺得係幸福又舒服嘅一對！
馬國明表情幾時都有驚喜。（影片截圖）
勝利之V手勢！（影片截圖）
片段一出，粉絲們即刻「釋懷」，指睇到台上二人冇交流，估唔到台下咁Sweet Sweet，仲催促二人快啲結婚。有人大讚二人得體、識得尊重場合，唔搶無綫「大壽」53周年嘅風頭。
有網民話靚湯明顯「幸福肥」，喺馬明嘅愛情滋潤下依然好Sharp！咁都得？（影片截圖）
撰文：黃蘊姿