唔少星媽都會喺網上同大家分享自己小朋友日常嘅可愛舉動，靚媽林芊妤（Coffee）就自佢囝囝彥彥（伯伯）出世冇耐就為佢開咗一個IG帳戶，由於佢嘅行為以及同媽媽嘅互動實在太過癮嘅關係，到今日已經累積咗有17.2萬嘅Followers，人氣勁過唔少明星呀！
不過Coffee喺較早前已經預告過會喺伯伯兩歲嘅時候關閉IG，當時已經唔少Fans大嗌唔好，因為伯伯實在係佢哋嘅精神食糧咁話。眨吓眼，今日已經伯伯今日就滿兩歲喇，Coffee講得到做得到，剛才開「最後」一個直播，畀伯伯同大家好好告別！
Coffee講到佢做叱個咁狠心嘅決定係有4個原因，雖然大家都好不捨，但相信愛錫伯伯嘅你聽完都一定會收貨嘅！
原因一
Coffee指佢一開始開設呢個IG嘅時候係因為見到伯伯好多行為動作都好得意，而佢都好享受再幫囝囝配上有趣Caption。不過隨住伯伯長大，佢都開始有自己嘅思想，Coffee認為自己唔可以再代佢講嘢；而伯伯更加係開始抗拒電話，有時會主動講「NO電話」，所以產量亦愈來愈少。
原因二
Coffee話伯伯外表上已經冇以前咁得意，依家已經演變成係「性格得意」。Coffee指「性格得意」會好難捕捉，所以只可以留畀自己欣賞。
原因三
Coffee表示伯伯依家就算出到街都伯有好多人關注，而佢得到嘅關注就係因為呢個唔係佢自已經營嘅IG。佢指唔想伯伯太細個就覺得自己好犀利，希望佢嘅起點同其他小朋友一樣，亦唔想佢有咁多叔叔、姨姨「傍住」，想佢刻苦耐勞，做一個普通、快樂嘅小朋友。
原因四
周身刀嘅Coffee依家同時經營緊3個IG帳戶，佢指如果再要兼顧埋伯伯呢個佢實在係分身不暇！
Coffee表示喺今晚12點後佢就唔會再更新伯伯嘅IG，粉絲們都非常唔捨得，有人更加話留言睇到眼濕濕！鬼咩……睇咗兩年，大家一早都當咗伯伯係自己個仔咁喇，但大家都好體諒Coffee呢個決定，並默默咁祝福佢哋健康快樂！
不過其實大家又唔需要咁傷心嘅，因為Coffee預告伯伯將來仍然有機會出現喺Coffee嘅個人IG，而佢呢個A/C亦唔會刪除，大家可以隨時重溫伯伯嘅成長經過。
Coffee最後寄語伯伯：「媽咪唔使你成績好好，你可以學自己鍾意嘅嘢、做自己鍾意嘅嘢，只要你開開心心，你開開心心媽咪就開心。」睇到唔係忠粉嘅小編我都眼濕濕呀！」伯伯最後仲大曬腹肌安慰粉絲，Coffee話如果佢再生第二個小朋友佢就會重新啟用呢個IG，唔少Fans都猜測佢係咪好事近，表示非常期待！希望Coffee唔好要大家等太耐啦！
圖片來源：伯伯IG
撰文:黃蘊姿