前港姐岑杏賢於2016年同袁偉豪分手後單身3年，不過舊年出席朋友婚禮時邂逅34歲金融才俊男友Kelvin，十月時終於告別單身拍拖。二人拍拖一年左右，今日岑杏賢就俾好姊妹們大爆佢就快結婚！
（東星娛樂）
岑杏賢自有新戀情之後每次提起男友都表現得「冧滋滋」，今年5月岑杏賢出席公開活動嘅時候被問到會唔同男友同居，佢就直指同男友都係朝住呢個方向發展。據知岑杏賢有感同男友理念目標一致，男方處事踏實成熟，打動向來對感情專一、寧缺勿濫嘅岑杏賢。
一年前做千雪結婚時做姊妹接到花球。（岑杏賢IG）
今年就真係到佢！（岑杏賢IG）
今日岑杏賢嘅好姊妹湯洛雯、朱千雪、張嘉兒以及蔣家旻等先後喺社交網上載同岑杏賢慶祝生日兼搞婚前單身派對嘅合照，湯洛雯留言：「希望你喜歡我們為你準備的一切。只想你幸福、快樂。」準新娘岑杏賢大曬鑽戒，面上洋溢幸福氣息！
（湯洛雯IG）
尋日岑杏賢被問到點同男友慶祝生日時大讚男友平時已經好Sweet：「佢知我做嘢辛苦，都會安排晚餐或者做啲特別嘢令我Relax吓！」不過問到佢婚期時佢就話暫時未係同埋順其自然，估唔到佢已經就快嫁得！
（朱千雪IG）
相反舊愛袁偉豪一個月前公布一年前已經成功求婚，但婚期就一直未定，而佢同張寶兒都未有計劃，婚禮仍然構思緊。「意外」搶閘快過舊愛拉埋天窗，不過岑杏賢就講過結婚唔應該比較快慢，相信佢同未婚夫都係「遇到對的人」先會咁快認定對方！
相關新聞:【兩個小生去camping】袁偉豪感觸重提舊愛岑杏賢 分手拍《使徒2》靠工作自我麻醉【下一頁】
（湯洛雯IG）
岑杏賢回應《晴報》訪問，大方承認未婚夫已經求咗婚一段時間：「 一直冇同大家公開，係因為未婚夫係圈外人，想尊重佢低調處理，希望大家唔好介意同明白。 但昨晚好驚喜好開心，冇諗過大家都忙着工作，但花盡心思為我送上最大嘅祝福，感激有一班好錫我嘅姊妹！其他細節唔透露太多，希望大家體諒。多謝，all your blessings，亦衷心多謝每一位所有嘅祝福。」
（湯洛雯IG）
撰文：黃蘊姿