63歲的張國強入行44年，演過無數角色。在近期他有份參演的兩套劇播出，他於《反黑路人甲》內飾演野心勃勃的警務處副處長；於《過街英雄》演愛錫女兒和姨甥女的舅父，兩個角色形象截然不同。他笑指《過街英雄》中久違地做好人角色，不過熱愛演戲的他表示，無論角色是忠抑或奸都同樣可以給予他很大滿足感。「近10幾年返TVB，演咗接近90個角色，有唔同角色可以試，就算係演壞人都有唔同程度嘅壞，好似辣椒都有唔同嘅辣度，都幾好玩，做演員有好大樂趣。」提起演戲，張國強這位「老戲骨」樂在其中，更指自己有很多未了願。
(圖片：《反黑路人甲》電視截圖)
(圖片：《過街英雄》電視截圖)
(圖片：《過街英雄》電視截圖)
球員出身的張國強，當年他得知TVB招聘演員，於是便抱着玩嘅心態參與試鏡，結果就因此契機進入了娛樂圈。「個時TVB招考球員做演員，當初抱着玩嘅心態，點知無畀人叮走，入埋娛樂圈就兩邊發展。」他指當時一路以拍戲為主，更經歷人生巔峰：「人生巔峰波影視三棲，當時好多機會，自己都好幸運。」
(圖片：張國強IG)
他於1976年加入TVB，首部作品為單元劇《無花果》，在1982年加入兒童節目《430穿梭機》，擔任第一代主持。不過他卻直言調入兒童組時內心都曾有掙扎：「未調入兒童組時，我都考慮咗好耐，遇到樽頸位。咁啱《430穿梭機》搵我主持人，當時都掙扎好耐要唔要調，不過諗自己未做過主持，想試下做，亦有出鏡機會，對訓練自己面對鏡頭有好大幫助。」不過張國強做兒童組做了4年便離開，他謂：「4年學嘅野都學晒，始終都係鍾意做戲。」
(網上圖片)
(圖片：張國強微博)
1997年，張國強舉家移民至加拿大，2004年返回香港，原來是因為張國強仍放不下拍戲。他憶述當時移民是為大勢所趨：「太太家人係外國，有移民優先權。個心一路想過去，趁住個勢移民。而2004年返香港係因為嗰時放唔低拍戲，之後同屋企人商量完，得到佢哋嘅支持，就決定返嚟。」
（圖片：《晴報》黃紫維攝）
2008年張國強重返TVB，演過接近90個角色。他坦言年紀大了加上經歷過不同事，回歸TVB後心態亦不一樣。「10年前嘅我好揀擇，會揀劇本、角色、年代，因為以前多機會，唔鍾意做就唔接。甚至清裝古裝都會推，因為咁辛苦要帶頭套，又怕唔好睇，怕剃咗頭髮唔知有無得生返出黎，所以唔想拍，有好多顧忌令自己唔敢行前，好多機會都白白流失咗。」張國強指重返TVB後已豁開咗，想嘗試唔同角色：「奸又好，清裝又好，《萬凰之王》都係光頭清裝，之後年幾都係keep住清裝，連拍廣告都係光頭。」他指這些年來「演藝履歷表」寫上大大小小的角色名字，使他非常有滿足感。
(圖片：張國強微博)
(網上圖片)
(圖片：《大醬園》電視截圖)
大抵張國強給人印象都是演反派為主，問他會否怕被定型，他坦言一定會，不過熱愛演戲的他從不介意：「撫心自問點解成日做奸角，不過如果啲人覺得你做奸做得好，佢就會搵你，已經係一個保證，畀到人信心。因為鍾意演戲，所以無推無介意。」
(圖片：張國強IG)
問到他演戲多年會否有未了願？他指：「有好多，希望試多啲類型，如粵劇、京劇、舞台劇，好多角色都未試過。作為演員肯接受挑戰，無論得與失，只要有用心做，就有好大滿足感。」
（圖片：《晴報》黃紫維攝）
張國強與太太於1988年結婚，結婚32年恩愛非常，育有一子兩女，分別為長子張寶軒、二女張寶洋和細女張寶藏，現都已長大成人。他很感謝太太幫他打理好家庭：「有佢支持，先有好大自由度係出面闖。」問到夫妻間相處方法，張國強就指自己一生都在學習如何做好的丈夫：「人不斷成長、世界又不斷變，學識互相聆聽、諒解，同太太互相學習，不足嘅地方佢又會教我。無論做父親或丈夫都是一直學習嘗試。」
(圖片：張國強微博)
張國強指他和太太重視子女個人品德多於學業成績，不會過份催谷子女，讓他們自由發展興趣。長子張寶軒於演藝學院電影學系畢業，之後主要在幕後方面發展，參與電影電視劇製作。張國強指自己對兒子影響好大，藝術方面有遺傳因子：「大仔好想係娛樂圈發展，尤其是電影方面，所以去咗演藝學院。我哋夢想係開製作公司，我係演員，佢係導演，係人脈合作方面唔會太差，製作公司都係籌備當中，希望有朝一日成事。」而兩位囡囡現在在加拿大發展，張國強指兩人同樣遺傳他的藝術細胞，「二女寶洋鍾意煮野，係加拿大做廚師；細女鍾意唱歌音樂，主修寫作，作曲填詞一手包辨，會向音樂方面發展。」
撰文：林惠珊
責任編輯：楊安莉