最近TVB於深夜重播6年前嘅劇集《使徒行者》，當中佘詩曼飾演嘅「釘姐」同林峯飾演嘅「爆seed」好有火花，無論搞笑定苦情戲碼都演得咁出色。除咗佢哋兩個，歡喜哥（許紹雄飾演）仲有唔少手下，其中阿狗（姚亦澧飾演）因為背叛歡喜哥，下場被狗咬死。相隔6年，原來現年42歲嘅姚亦澧已經開咗間舖頭，做老闆。
(《使徒行者》電視截圖)
(《使徒行者》電視截圖)
姚亦澧（前名姚浩政）曾經到英國留學，修讀諾桑比亞大學工商管理學士課位，後來再修讀香港大學運動科學及康樂管理學士課程。讀書期間，姚亦澧一直有兼職做模特兒，試過到上海參加模特兒總決賽。06年，佢決定闖新天地，於是參選香港先生競選。雖然當時佢父母唔太贊成佢參加，但佢去做想做嘅事。最後佢雖然未能得到獎項，但就因為呢個比賽加入咗TVB。
(myTV SUPER圖片)
{{hket:inline-image name="21.jpg"}}{{/hket:inline-image}}
(姚亦澧instagram截圖)
初入行，姚亦澧喺《東張西望》擔任主持，每個月爆騷，曝光率夠高。後來佢唔想做主持做一世，想擺脫正經形象，試吓拍劇。當時《東張西望》嘅幕後工作人員唔建議佢轉入劇組，但係佢堅持想試試，結果呢個決定令佢一度陷入低潮。
(姚亦澧instagram圖片)
(姚亦澧instagram圖片)
嗰陣姚亦澧成年都冇工開，冇收入，做主持時儲落嗰10幾萬已喺半年內用晒。佢曾承認自己性格內斂，唔識交際應酬，成日怕講多錯多得罪人，寧願唔出聲，所以白白錯失好多演出機會。佢接受《晴報》訪問時都坦言一度懷疑自己做錯決定：「當時好徬徨，問自己係咪做錯決定，曾經有少少抑鬱。」
姚亦澧唔想轉行，放棄演藝事業，但係又需要錢維持生活開支，擁有兩個學士學位嘅佢去咗做兼職揸貨Van同搬貨，繼續等待機會。嗰段時間姚亦澧每日要6點起身，7點去貨櫃碼頭拎貨、搬貨。儘管曾經被客人認出，不過佢冇介意過，反而當作人生體驗：「可以講係最貼地、最充實，亦令自己得到寶貴嘅人生經驗，同認清自己嘅方向，值得。要多謝呢段時間幫過我嘅人，感恩！」
▼TVB開始有工作安排，佢就冇再揸貨Van同搬貨
(姚亦澧instagram圖片)
(姚亦澧instagram圖片)
唔經唔覺，姚亦澧已經踏入4字頭，上年佢同拍檔夾份開咗間餐廳進軍飲食業。未試過做飲食生意嘅佢邊學邊做，又落手落腳執枱，每晚只係瞓到2、3個小時。受到今年疫情打擊，佢表示餐廳生意都受影響，後來佢推出外賣Shake Shake海鮮筒，反應好好：「生意不錯，一個月內賣超過500桶！」疫市期間，佢唔止喺尖沙咀開第二間分店，嚟緊仲會喺銅鑼灣再開分店、喺美食廣場拓展業務，仲會同飲食集團合作，好厲害。
(受訪者提供)
(受訪者提供)
(受訪者提供)
撰文：張芷晴
責任編輯：楊安莉