41歲前商台DJ細So（蘇耀宗）昨日被爆出婚外情，過去2年半來背妻暗交KOL「阿B」，期間兩人於私竇幽會，更會狂Send露骨短訊，完全將老婆（阿Wing）拋諸腦後。事件唔止令到細So家人失望，一眾一直覺得佢係「好好先生」嘅Fans都跌晒眼鏡，更有唔少人都好想知道邊個係「阿B」，出動人肉搜索。
【多圖】【愈爆愈多】細So出軌「天真」小三阿B終於現身 35歲有夫之婦認為對方墮胎【下一頁】
（阿Wing IG）
細So尋晚雖然同老婆協商於網上作回應，但今日決定現身同大家面對面交代一聲：「我承認我做錯咗，無論我個人做錯咗，感情事做錯咗，我對唔住我太太﹑我家人﹑關心我及信任我嘅朋友，仲有第三方，我好誠懇講句對唔住，我冇得請求大家原諒，當然我冇得請求太太原諒，將呢個決定交畀大家﹑亦交畀佢（太太）。」
細So日前親手為囝囝製作書枱。（阿Wing IG）
細So指兩個月前向太太坦白，太太選擇畀機會佢，原諒佢，事件往後兩個月，細So盡責任做好爸爸好丈夫，望以行動證明。細So話好希望大家畀空間佢同佢家人，更指重提事件對每一方都唔係咁好，會畀更多壓力及傷害。
（阿Wing IG）
細So表示六月後同「阿B」已冇聯絡。承諾會繼續愛護太太，希望做盡責爸爸及丈夫，但就話唔夠膽講可以成為好男人，希望有改過機會。又話多謝太太畀咁好機會佢，要好好珍惜呢個機會。今日「連登」有網民發現其IG與老婆阿Wing嘅「恩愛相」以及兩個仔嘅相大部份亦删走。
雖然細So認晒衰仔，但今日「阿B」好友繼續爆料，指細So呢兩年十次同「阿B」見面有七次都係為發生性行為，之後因為加租冇續租私竇，之後每次都喺車上見面，返電台都前去獅子山郊野公園喺車上進行性行為。
（細So IG）
而2018年1月，阿B做身體檢查發現有濕疣，而且係性行為時出血先知中咗HPV，質問下細So認錯：「I’m so sorry b, That’s I 傳染了你，I love you. Don’t give me. Let me hold your hand and teach you.」並承認同阿B一齊前的1年同另一人發生性行為。去年4月阿B因為HPV病毒變成CIN1（子宮頸癌前病變），阿B入院做手術，細So都冇前去探望，醫藥費都係阿B自己畀。
不過二人並非因為染上HPV而分手，真正分手係今年6月左右，細So畀商台抄魷後指冇時間見面，又話老婆發現咗二人關係管得好嚴。
好友指阿B曾送不少禮物予細So，甚至送玩具畀佢兩個仔兒子。細So雖然從未承諾阿B離婚同老婆，但一直氹阿B「生命裏面唔可以冇咗你」，阿B好友指細So分手當日更鬧番阿B轉頭，叫阿B唔好爆畀老婆知，又話自己真係愛阿B，為勢所迫先唔見面。
（阿Wing IG）
好友更曾私訊細So叫佢珍惜阿B，細So當時回覆：「我很珍惜我們的，我身不由己，我很無力，對於我們，我一直捉不住她。我每日都好亂，每日都好驚，仲要冇咗份工，今日唔知聽日事，晚晚仲要開live，扮若無其事，去安慰別人，有人明咩……我知道佢為我犧牲咗好多，我愛佢，我唔想傷害佢，我根本保護唔到佢。」
（阿Wing IG）
而好友更於今年6月私訊細So老婆指阿B證實感染HPV，話佢如果佢有車cam會見到好多畫面，驗完身都會明白，又請細So老婆叫佢老公唔好再搵阿B。
（阿Wing IG）
不過細So就否認自己令阿B染病，指當其時從阿B口中知道呢件事，因為未了解狀況，只能同佢道歉同埋安撫佢，而事後自己同太太都有去做身體檢查發現冇染病。
撰文：黃蘊姿