雪梨日前接受好友苑瓊丹主持電視節目《開工大吉77》擔任嘉賓，雪梨回憶當年拍攝港台節目入行，繼而被李添勝發掘做主角經過，又提到當年家姐米雪極力反對佢同徐少強交往。
（大會提供）
雪梨指當年家姐米雪已經好紅，但佢一出道時光芒甚至係超越咗家姐：「又要拍電影又要拍電視。當年就係拍徐少強投資嘅電影而認識對方，一開始大家都好Cool，片場見到都係打個招呼，直到去泰國拍電影時，佢帶我去大型宴會當眾錫我一啖，我就深深愛上咗佢。當年我只得15歲，我形容當時係天真無邪、係驚喜啊，你（徐少強）大我十幾年都會死喺我手度！」
（網上圖片）
雪梨指徐少強為人浪漫，令佢好快墮入愛河，但卻被家姐米雪反對：「我家姐反對，專登飛來泰國，去徐少強房間叫我走，好惡咁叫我買機票返香港，我話呢度未拍完，死都唔肯走，佢就激氣自己返香港。」
雪梨（左）與米雪（米雪IG）
後來雪梨17歲未婚懷孕，當年呢個消息震驚娛樂圈，佢亦為此放棄事業：「當時知道懷孕時，仍有工作在身，都未見肚就拍埋先。我任性，又唔想墮胎，所以決定生BB。為生仔而放棄工作，我從不後悔，因為我過緊另一個階段、角色。直到我女兒出世之後，就同徐少強分手，當時好像傷心咗半個月，就去亞視繼續工作。雖然呢十幾年都冇咩緋聞傳出，啲人以為我驚咗，實際係地下情，仲好多個添，不過依家就冇喇！」雪梨指自己遇到幾個都係一腳踏兩船嘅人，連自己阿媽都話我佢命水係咁。
米雪同徐少強多年後合照。（網上圖片）
（米雪微博）
復出工作後，交由母親照顧子女，幸好兩兄妹關係親近，令雪梨專心工作：「因為以前我年紀輕唔識湊，用錯方法以為打佢、鬧佢就得，用錯上一代嘅教法，所以一直都好內疚。」雪梨話之後自己同阿仔建立好似朋友咁嘅關係，慢慢誘導：「教佢，嗱，18歲有性衝動，記得買個避孕套唔好搞出人命，要有經濟能力先好有BB。」
（網上圖片）
雪梨就話自己有團火，希望再為演藝事業打拼：「我想自己搞個訓練班，教小朋友點演戲，唔好走冤枉路！雖然我由細到大都好任性，依家都仲係，不過都算成熟咗，要諗行唔行得通，有冇價值去做呢一件事。」
（大會提供）
撰文：黃蘊姿