於無綫新劇《反黑路人甲》中飾演高海寧助手的吳嘉儀（阿七），昨日發生家居意外，被𠝹刀誤傷腳。從相中可見，阿七左腳腳趾雖然已用紗布包紮，但依然流晒血，睇到都覺得痛！阿七又指自己有微燒，新冠肺炎檢測結果呈陰性。
（圖片：吳嘉儀IG）
（圖片：吳嘉儀IG）
今日阿七在社交網留言，講述自己的情況及感謝醫護的細心照顧：「昨天自己不小心發生了家居意外受傷了，心情不好，有微發燒。由博愛醫院轉送到屯門醫院檢測觀察，留院一晚，檢測結果negative（陰性），現在留醫骨科，希望可以盡快聯針回家。」網友都留言祝她早日康復。
（圖片：吳嘉儀IG）
阿七接受本報訪問時講述意外事發經過：「呢兩個星期都忙緊籌備同男朋友嘅新居，兩個人夾手夾腳搬傢俬拆箱裝置。我喺用cutter開箱嘅時候，因為唔夠力卡住咗，大力拉返出嚟嗰下，成把cutter就飛咗出嚟插落腳。」
（圖片：吳嘉儀IG）
阿七指初初以為是少少𠝹傷，但後來發現原來傷口都好深：「仲諗住行去廁所拎膠布，點知拖出一條血路....間屋變咗血案現場！因為止唔到血，最後要救護哥哥送去醫院。」
（圖片：吳嘉儀IG）
阿七因令到屋企人同男朋友擔心而十分自責，又指擔心中招惹到TVB嘅同事：「一路搭十字車一路喊，面都紅晒。去到醫院一check有37點幾度，所以急症室嗰邊幫我消毒咗傷口，就要即刻送我去觀察病房做COVID 19 test同隔離。琴晚成晚都超忐忑，到今朝知道係negative就定啲。但係個傷口未聯針，又要比醫生挖開少少檢查有冇傷到神經線。好痛...最後聯咗6針，依家行路好似隻企鵝咁。」阿七笑言護士指她的傷口好「戲劇化」，幸好她現在都無大礙已經出院，不過她就指兩個禮拜都唔可以做任何運動。
（圖片：吳嘉儀IG）
29歲的吳嘉儀在2015年於香港演藝學院畢業後，參加第28期藝員訓練班而入行。入行後參演過不少劇集，如在《愛回家之八時入席》、《金宵大廈》等。她常被觀眾指與另一藝員李旻芳撞樣，兩人更曾在《愛回家之八時入席》中飾演姊妹。
（圖片：吳嘉儀IG）
她常被指與李旻芳撞樣（圖片：吳嘉儀IG）
（圖片：吳嘉儀IG）
最近吳嘉儀在TVB劇集《迷網》中飾演警察，她表示《迷網》劇種比較認真：「始終係有個使命要教育觀眾小心騙案，所以我自己都覺得只係一個合格嘅角色演出。」
（圖片：吳嘉儀IG）
而她在《反黑路人甲》中飾演高海寧助手，她表示喺入面嘅年資算係新，更大讚高ling：「高ling係一個好認真演戲而且冇架子嘅演員，佢真係好肯喺現場夾戲。佢知我讀過話劇，都會問吓點樣先誇啲啲又演出個喜感。我覺得佢係劇集個角色好突出，似《鹿鼎記》入面嘅建寧公主。 我雖然係丫鬟，但遲啲會有戲份交代高ling個角色係雙面人，我嘅功能係心腹，唔多唔少都刻劃到娛樂圈嘅一啲典型人物。」
《反黑路人甲》中飾演高海寧助手（圖片：《反黑路人甲》電視截圖）
（圖片：《反黑路人甲》電視截圖）
吳嘉儀指現在都keep住都拍緊劇，「有啲角色都幾爆，好似下星期播嘅《過街英雄》。不過公司有公司嘅planning，我啲劇有啲拍咗兩年幾（《堅離地愛堅離地》）都未播， 希望會陸續出街啦，畀觀眾見到唔同嘅阿7嘛。」
撰文：林惠珊
責任編輯：楊安莉