日前啱啱滿55歲嘅曾華倩喺微博Post出自拍照，不過呢張相幾乎認唔到係佢本人，雖然相中嘅佢白滑無皺紋，但雙眼似乎就因為美顏程式開嘅強度太高，同平日雙眼亮晶晶嘅佢完全唔同。
（微博圖片）
曾華倩喺Post中留言，主動徵求主持同埋拍戲工作：「休息已久，是時候找工作做了，有沒有好介紹呢？備註：哈……哈……我不擅長，能歌善舞的，主持及拍戲﹐現在這刻還可以，遲些就說不定了。」
《倚天屠龍記》中飾演郭襄。（《倚天屠龍記》截圖）
此post一出隨即引嚟好多網民留言。好多網民都表示好掛住佢嘅幕前演出，尤其係佢嘅古裝造型，靚到真係冇乜幾多個花旦比得上，大家都好希望佢快啲復出拍戲。
（《新紮師兄》截圖）
另有網民提議曾華倩好似鄭丹瑞咁，返無綫做藝員訓練班導師，教導一班新力軍做戲同主持技巧。亦有人提議曾華倩開直播同做明星帶貨；又或者去大陸拍戲，演員片酬嘅都好高，只要佢肯「出山」，相信都好多人搶住搵佢做嘢咁話。
（林浩賢IG）
曾華倩2015年初，暫時退出幕前工作，主要照顧兒子林浩賢到國內外參加各種游泳比賽。2017年尾都有零星為「亞洲電視數碼媒體」擔任主持工作。至於拍劇，佢更加係2008年之後就再冇新作品，所以佢嘅劇迷都真係「餓」咗好耐！
《雪山飛狐》中曾華倩嘅美貌令人驚艷。（《雪山飛狐》截圖）
曾華倩出道冇耐就同周星馳一齊主持兒童節目《430穿梭機》，之後再轉戰拍劇嘅佢好快就出演女主角。曾華倩於《雪山飛狐》中飾演嘅苗若蘭美若天仙，初次演戲已經被大讚演技生動又自然，古裝打扮令人驚艷，深得觀眾喜愛。之後曾華倩出演機會不斷，《倚天屠龍記》、《新紮師兄》、《銀狐》等角色都大受歡迎，成為了無綫力捧嘅當家花旦之一，和張曼玉、黎美嫻、戚美珍同陳玉蓮合稱「無綫五美」，風頭一時無兩。
（網上圖片）
撰文：黃蘊姿