唔少香港小姐從小就係美人胚子，天生麗質，好似陳凱琳、張嘉兒、李施嬅近日就齊齊回顧舊時，喺社交平台上載多年前嘅童年照。
陳凱琳
陳凱琳上個月啱啱為鄭嘉穎再誕下細仔鄭承亮Yannick，如今母子已經出院返屋企休息。
喺屋企坐月期間，陳凱琳搵番細個啲相出嚟，話想睇吓BB同佢似唔似樣。從相片可見，陳凱琳小時候對眼已經好大，仲有瓜子臉，輪廓好深、笑容甜美。唔少網民留言大讚佢好靚女：「公平咩...由細靚到大」、「細個一樣咁靚」、「你好似冇咩baby fat」、「個小妹妹好得意呀」，有網民甚至形容佢係「小公主」，陳凱琳就搞笑回覆：「介紹你識」。咁細個陳凱琳就咁有氣質，唔怪得可以奪得2013年香港小姐競選冠軍啦。
(陳凱琳instagram圖片)
(陳凱琳instagram圖片)
李施嬅
近期宣布加盟邵氏，成為旗下藝人嘅李施嬅呢排留喺家中避「炎」，最近佢喺instagram甫咗一張童年照，相中嘅佢著住滾軸鞋，坐喺紅色車車頭，對住鏡頭甜笑。老友「豹嫂」胡蓓蔚、姚子羚、陳山聰留言大讚佢好可愛，唔少網民都留言讚佢細細個條腿已經好長，仲愈大愈索，唔怪得可以喺2003年香港小姐競選得到「最上鏡小姐」獎項：「差啲認你唔出，果然女大十八變，不過認真睇啲睇，五官同神韻係有啲似」、「小時候好可愛，長大美麗」。另外有部分網民反而將焦點放咗喺架車上面，發現架車係法拉利喺1996年已停產嘅車款，大讚靚人配靚車。
(李施嬅instagram圖片)
(李施嬅instagram圖片)
張嘉兒
2007年香港小姐冠軍張嘉兒同老公Nathan婚後育有兩個女，後來佢專心相夫教女，淡出幕前。闊別TVB 3年，最近佢宣布回巢拍攝新一輯《陀槍師姐》。
(張嘉兒instagram圖片)
近日張嘉兒喺社交平台分享咗張發黃嘅童年照，再叫大女喺相後擺咗差唔多姿勢做對比，兩母女簡直如餅印一樣，佢話：「每個人都話我同我個女好似樣，究竟我哋嘅餅印程度係有幾高？你哋會唔會搵到張餅印得過我呢一張嘅相呢？唔怕羞嘅請分享。」仲笑言：「佢又copy得我幾足喎，一齊假笑」唔少網民都留言話兩母女一樣咁靚：「一樣樣，好可愛呀」、「似媽媽眼大大」等。
(張嘉兒instagram圖片)
撰文：張芷晴
責任編輯：楊安莉