出名「語不驚人誓不休」嘅馮盈盈日前又喺無綫節目《#後生仔傾吓偈》中發表「偉論」惹負評。
（馮盈盈IG）
香港中文大學醫學院麻醉及深切治療學系前副教授許金山，被控於2015年謀殺妻子及16歲女兒，至2017年被捕。許金山嘅妻女當時被發現於私家車內昏迷，送院後發現兩人因吸入一氧化碳死亡。警方追查後發現一氧化碳來自車尾箱內嘅瑜伽波，而許曾查詢一氧化碳報價，加上當時許有婚外情，同時與妻子持有物業，或成殺人動機。案件於本月初在高等法院審判，許金山兩項謀殺罪成判囚終身。
許金山（網上圖片）
而新一集節目《#後生仔傾吓偈》一眾主持人同一班後生仔談及呢宗殺妻案，主持陸浩明提出如大學教授因為經濟原因，而無法跟太太離婚，但又發生婚外情，問同場的「後生仔」們可否接受？在場一眾後生仔都異口同聲表示教授嘅行為難以接受，唯獨馮盈盈有唔同嘅見解：
「Open relationship嘛，我覺得佢哋反而幾有責任心、承擔。男嘅本身外面有其他人，已經想提出離婚，但最後因子女關係，而覺得要肩負起爸爸責任、維持呢頭家，佢簡直係犧牲小我，完成大我。」
（《#後生仔傾吓偈》截圖）
一眾後生仔即場指出盈盈美化咗叱位教授嘅行為，叫佢唔好美化整件事。事後呢番言論自然都引起好多網民討論，大部份都係插盈盈嘅言論離經叛道，更指責佢為咗「出位」亂噏廿四，諗嘢歪晒咁話！
（《#後生仔傾吓偈》截圖）
不過盈盈都急急澄清番自己嘅真正立場，指自己喺節目中以及佢本人都冇認同殺人呢個行為，佢亦有強調案中事主犯咗嚴重罪行。
（《#後生仔傾吓偈》截圖）
佢指節目嘅宗旨係將社會唔同人士嘅想法同觀念反映出嚟，而佢只係轉述自己資料搜集時見到網民提出過嘅愛情觀，令大家可以從更多角度討論，而唔係是只有單一立場同意見，令觀眾都可以作批判性思考。盈盈話下次會講明係「有網民在網上曾經提出過以下意見」，更為令大家混淆同誤會致歉。
營造有正反意見嘅節目效果，大家都唔好太緊張！（《#後生仔傾吓偈》截圖）
撰文：黃蘊姿