新城知訊台執行總監程凱欣昨日證實確診新冠肺炎，由於程凱欣是節目主持人之一，過去潛伏期內所接觸嘅圈中人都不少，當中包括歌手、歌手的宣傳人員和中醫師等等，引發新一輪感染恐慌。
中招高層程凱欣（程凱欣Facebook）
消息證實後，新城進行徹底消毒，除新聞部維持最低限度必要人員，留守至昨午5時半外，全台暫停運作，只以自動化電腦播歌，電台之後改為三台聯播，繼續向市民提供廣播服務。
(圖片：《晴報》林良明攝影)
原本新城公關指今日全台繼續關閉，由於廣播條例的限制，新城電台係唔能夠中斷廣播，所以今日一早FM104財經台幾位員工率先返到位於黃埔嘅辦公室開咪，並安排104（新城財經台）同997（新城知訊台）兩台聯播。
今日下午4點開始，新城997知訊台恢復獨立運作，復播打後時間暫定都係播放錄音節目。
（Facebook圖片）
新城有部分復工同事喺Facebook打卡，帖文入面竟然出現一位冇戴口罩的工作人員，有人解釋，除罩同事當時正係食緊早餐，不過出Post嗰位同事好快就刪咗帖，之後再補上另一張相，嗰位工作人員已經戴番口罩。
（Facebook圖片）
不過最恐怖嘅係，有新城內部員工爆料，指相中其中一個人係中招高層程凱欣嘅幕後男友，即係身為密切接觸者嘅佢仍然照樣返工，冇自我隔離。
另外，尋日有員工指中招高層程凱欣怕侷促，一向在電台範圍甚至直播室都不會佩戴口罩，佢認為現時節目有視像畫面直播出街，為免影響節目質素，佢都要求所有DJ同嘉賓都唔可以戴口罩做節目。
（程凱欣Facebook）
今日佢喺facebook留言向受影響的同事和朋友致歉：「多謝大家的關心和鼓勵，首先我想向曾經有跟我接觸過的同事及朋友，為他們帶來不便，實在萬二分抱歉。這兩天收到各方好友的問候和祝福，是我今次疫情中最大的得着。特別是新城電台的團隊精神，也可以在今次事件中深深體驗得到，即使事出突然，但同事們應變能力很高，他們叫我甚麼也不用管，只好安心靜養。」
（程凱欣Facebook）
程凱欣指自己依家病情穩定，正喺醫院接受治療：「已由入院時的獨立房間轉去四人房，並非外間說我病情反覆，現正服用抗生素，當然身體會有一些反應，但基本上不大問題。認識我的人，向來都知道我積極、樂觀，所以我有信心很快康復出院。」
（程凱欣Facebook）
不過關於佢冇戴口罩以及要求DJ同嘉賓唔戴口罩做節目佢就話唔再作任何回應：「最後，今次疫情實在非常嚴峻，希望大家多加留意，減少社交活動，勤洗手、消毒、戴口罩，相信我和所有香港人都會打贏這場仗。在此再要多謝我的同事，新城團隊。我以你們為傲。」
（程凱欣Facebook）