九巴贈退役巴士 華麗變身創意學習空間

巴士每日服務唔少市民，退役後同樣有貢獻。黛安知道，九巴2016年底開始推行舊巴士及退役巴士捐贈計劃，將退役巴士贈畀非牟利機構循環再用，今個月就向路德會聖十架學校捐贈退役巴士，希望為小朋友帶來更多有趣嘅學習體驗。

黛安聽校方介紹，巴士上層將採用芬蘭學校嘅STEM課程，利用白色積木及問題為本學習模式，引導學生了解城市中唔同大樓功能，同時會串連校本中國歷史及文化課程中嘅「清明上河圖」，運用多媒體教材以古鑑今，啟發學生對未來城市規劃嘅思考；至於巴士下層就將會打造成芬蘭式閱讀室，提供舒適空間畀學生享受閱讀樂趣！創意無限，一定要畀個讚。