【殺手】 關偉倫演警察被下屬吳業坤激死 與葉振棠莫逆之交有情有義

TVB劇集《殺手》中，警察阿鳳（吳業坤飾演）為人熱血，佢嘅出現令到眾殺手同清道夫陷入窘境，然而證據消失，以及上司許sir（關偉倫飾演）對佢長期唔理解，令佢好辛苦。回到現實生活，關偉倫啱啱相反，係個有情有義之人。

劇中，阿鳳好有上進心，每次遇到任何案件都會用心搵證據，想重組案發經過，搵出真兇，然而許sir並唔理解，仲成日責備佢。例如阿鳳想同許sir一齊搵人問話，許sir只想放工，駁斥：「依家你係阿頭，定我係阿頭？」又例如阿鳳從蛛絲馬跡斷定兇手功力高強，斷定係職業殺手所為，許sir就話佢諗多咗，令到阿鳳相當失落。最新一集，阿鳳終於搵到案發前嘅閉路電視片段，開心自己終於可以破案，於是約許sir出嚟見面，許sir埋怨阿鳳大清早6點就叫自己起身出門，阻佢休息。

{{hket:inline-image name="11.jpg"}}{{/hket:inline-image}}

(《殺手》電視截圖)

{{hket:inline-image name="12.jpg"}}{{/hket:inline-image}}

(《殺手》電視截圖)

點知，阿鳳前一晚跌咗入森森（高海寧飾演）同Zero（陳豪飾演）等人設計嘅陷阱，閉路電視片段冇咗真兇嘅身影。許sir忍無可忍，指阿鳳壓力大，情緒病復發，要佢放假。

{{hket:inline-image name="13.jpg"}}{{/hket:inline-image}}

(《殺手》電視截圖)

{{hket:inline-image name="14.jpg"}}{{/hket:inline-image}}

(《殺手》電視截圖)

其實關偉倫真人好有義氣，佢同葉振棠仲成為咗莫逆之交。原來佢哋係合作拍攝亞視劇集《我和春天有個約會》時認識，後來佢哋發現大家都鍾意砌電腦機、玩音響，故成為朋友。及後，關偉倫搬去新界住，葉振棠搬去佢隔籬住，變埋鄰居。多年來，葉振棠喺香港、國外有演唱會，關偉倫都會陪佢、照顧佢。關偉倫曾接受傳媒訪問表示，葉振棠出埠表演通常去完一個地方唱幾場，第二日就要搭飛機去其他地方唱。外國機場大，有時要轉車先去到機場閘口，葉振棠視力唔好，關偉倫唔放心，所以先會跟住葉振棠。關偉倫又指，如果葉振棠喺香港有演出，佢會盡量接送對方。

{{hket:inline-image name="15.jpg"}}{{/hket:inline-image}}

(《流行經典50年》電視截圖)

關偉倫喺70年代畢業於邵氏同TVB合辦嘅藝訓班，後來轉至麗的電視。從麗的到亞視，關偉倫曾參演過好多劇集，期間TVB曾經搵過佢跳槽，不過有情有義嘅佢就話與同事關係好，猶如兄弟姊妹咁，做得好開心，所以冇跳到槽。佢話，以前就算唔使拍劇，都會同同事返公司飯堂食監製釣返嚟嘅魚，令佢覺得好有人情味。到亞視「熄機」時，關偉倫覺得好可惜，佢認為麗的同亞視曾經輝煌過，只係後期嘅亞視後繼無力、唔爭氣先會不獲績牌。12年，關偉倫曾加盟香港媒體製作，直至16年先加入TVB，繼續做綠葉。

{{hket:inline-image name="16.jpg"}}{{/hket:inline-image}}

(《蕩寇誌》電視截圖)

撰文：張芷晴
負責編輯：楊安莉