TVB劇集《殺手》題材抽離但又貼地，吸引唔少觀眾追睇。視帝黎耀祥同陳豪擔正做主角，喺劇中鬥身手、鬥演技，各有發揮，得到網民熱烈好評。究竟陳豪喺飾演嘅殺手Zero時候花咗咩心思？佢同拍檔李佳芯又合作得好唔好？
(TVB電視截圖)
(TVB facebook page截圖)
原來陳豪曾經抗拒喺劇中沖咖啡，佢解釋：「開頭我有啲抗拒，戲裡面沖咖啡，真實又沖咖啡，唔係幾好。但調番轉，呢個行為可以令觀眾睇得舒服同實在，覺得同我本人一樣，好真。」好彩陳豪最後決定跟番角色設定，事關唔少幕後工作人員、藝人聽到陳豪喺廠沖咖啡，都話想試吓佢嘅手勢，大飽口福。
(《東張西望》電視截圖)
不過相比起可以畀自己大騷咖啡技術嘅角色Zero，陳豪對黎耀祥嘅角色閻武仲有興趣，佢認為飾演呢種小人物可以帶觀眾走入現實生活中，更貼地，而且喺演繹上會更多樣化。另外，陳豪認為同黎耀祥對手戲唔夠喉，黎耀祥笑言，如果下次有機會應該試吓扮情侶，出嚟效果就會好驚喜。陳豪認同，強調要開心為主，樂而不淫。
(《東張西望》電視截圖)
唔少觀眾覺得陳豪演繹方式好搞笑，例如佢一開始對住Cash（李佳芯飾演）尖酸刻薄，對住森森（高海寧飾演）就口甜舌滑，態度完全相反；又例如佢明明上一秒仲鬧緊希仔（陸卓謙飾演），但下一秒喺森森面前就就扮鍾意佢咁，監製陳維冠稱之為「Mo式幽默」。
(TVB電視截圖)
陳豪坦言：「我唔知咩嚟，我已經好努力咁做，但大家攞我嚟取笑，既然大家開心，我有咩所謂啫。我喺劇係攞正牌亂嚟，我係個幾鍾意亂嚟嘅人，你唔停我，即係想我去盡佢，啲對白一啲啲係我諗。」黎耀祥認為，陳豪就係天生有呢種喜劇魅力。
(《東張西望》電視截圖)
陳豪繼《潮流教主》、《誇世代》，又再同李佳芯做對手戲。劇中佢哋發展神速，由冤家，到上司下屬，依家已經成為情侶，成日放閃，好多觀眾都話佢哋係「最佳拍檔」，火花十足。李佳芯大爆自己曾經擔心爆炸頭造型好奇怪，惟獨陳豪大讚靚女，仲叫佢現實中可以繼續保持嗰個髮型。李佳芯又形容陳豪係個頑皮小朋友：「唔好睇佢已經係爸爸...總之每次同佢合作都好有新鮮感，呢啲拍檔好難得。」陳豪就笑言鏡頭後都要落力搞笑係有原因：「為咗要發掘李佳芯嘅潛能，我盡量做（搞笑）之前冇話畀佢知，咁就可以拍到佢最真嘅反應。為咗佢，我每日都諗要啲新嘅嘢出嚟。」李佳芯聞言即話：「係咩？咁辛苦呀？」
(TVB電視截圖)
撰文：張芷晴
責任編輯：楊安莉