現年26歲嘅2017年香港小姐冠軍雷莊𠒇（Juliette Louie）當選之後負評不斷，指最後「DO姐有多一票」所得出嘅賽果有欠公允，有網民更加指佢嘅樣貌似球星蘇亞雷斯，爭議不斷。
自信十足嘅雷莊𠒇都不甘被抨擊，多次正面回應網民攻擊，更表示：「I don't care about people not liking me」（我不在乎有人不喜歡我）。雷莊𠒇一年後卸任，決定唔再同TVB續約返回加拿大發展，追尋佢嘅演員夢。
（雷莊𠒇IG）
返咗加拿大之後雷莊𠒇都Keep住Update佢嘅社交網站，見身形弗到爆嘅佢不時都有一啲模特兒工作，發展似乎比喺香港嘅時候理想。除咗工作照之外，佢仲不時Post同男友嘅合照放閃，雷莊𠒇一年前左右曾講過同男友係長距離戀愛，不過男友就堅持一個星期搵佢一次，打風都打唔甩咁款。
雷莊𠒇同牙醫前度之前好Sweet。（雷莊𠒇IG）
不過原來二人喺今年３月已經分開咗，雷莊𠒇更加Post出二人嘅合照並留言:「Thank you for being in this chapter of my life.（感謝在我生命中出現。）」，見佢哋都仍然有互相Follow大家，似乎再見亦是朋友。
此情不再。（雷莊𠒇IG）
桃花超旺嘅雷莊𠒇好快嘅已經有大隻靚仔新歡Matthew Giuffrida，今日佢哋仲各自喺自己嘅社交網公開Sweet爆合照。
（雷莊𠒇IG）
根據佢同男方一個共同開嘅IG，二人最遲喺５月嘅時候已經撻着，喺佢哋第一個開嘅Post二人留言:「We swiped right. Thanks Tinder!（我哋「刷」得啱，感謝Tinder！）」原來二人係透過手機交友程式認識。
（雷莊𠒇與Matthew IG）
Matthew係意大利加葡萄牙混血兒，細雷莊𠒇兩年嘅佢係IG網紅加YouTuber，人氣仲勁過女友！毛茸茸嘅佢加上大大隻嘅身形非常性感，難怪雷莊𠒇同佢咁快打得火熱！
（雷莊𠒇與Matthew IG）
撰文：黃蘊姿