出名錫Fans嘅劉德華每年都同佢「華仔天地」嘅Family一齊慶祝6月18號嘅會慶，不過受新冠肺炎疫情影響，「華仔天地」32周年嘅聚會今年無可奈何要取消。不過劉德華都好有Fans心，喺官網上載咗一條短片，同Fans網上隔空慶祝，一解「雙思」之苦。
（大會提供）
短短廿分鐘嘅短片除咗唱歌之外，華仔仲喺片段中大講自己近況同工作，一向視Fans為「家人」嘅佢, 更親筆寫咗封深情嘅「家書」，細說過去一年因生病同疫情影響下令演唱會取消、歲月如梭發現自己眼角多咗皺紋，又多咗白髮，不過無論一切點改變，彼此「一家人」嘅心係永遠不變，令人非常感動。
（大會提供）
華仔分享疫境下除咗為新工作做好準備外，亦先後同太太及囡囡共度咗兩個愉快嘅生日，其中送畀太太嘅生日禮物, 更加係佢同囡囡合力創作嘅愛心畫作，短片中華仔都有同大家分享囡囡最近嘅作品，原來佢兩父女一齊上網自學畫畫，華仔都不禁稱讚女兒有畫畫天份，畫得好過自己。華仔形容囡囡同「家人」們（Fans）都係佢嘅心肝寶貝，相信呢句「心肝寶貝」一定令fans冧到爆！
（大會提供）
（大會提供）
此外，華仔仲live唱咗幾首歌送畀Fans，包括：《月亮代表我的心》、《笨小孩》、《 我知道》、《 一起走過的日子 》、《情人happy birthday》等。華仔同fans互動環節時, 被問及自己最愛邊三部電影，佢坦言想再演一次「雷洛」同留長髮演《天若有情》，《瘦身男女》佢都好鍾意，不過要佢增肥再扮肥佬就實在好艱難。
（網上圖片）
（大會提供）
疫情期間「劉德華慈善基金」都有捐款給畀唔同團體，向有需要人士伸出援手。「華仔天地」除咗不定時舉行fans聚會外，大家都同華仔一樣抱住一顆善心，做義工兼四出幫助弱勢社群，所以華仔都好珍惜呢一班志同道合嘅Fans。
（大會提供）
撰文：黃蘊姿