演藝人協會會長古天樂牽頭發起「香港電影工作者疫境支援計劃」，派$9,000元幫助基層電影人，原本係好事嚟，但近日就搞到是非不斷！事關善款數目有限，以致並非人人有得派。有指部分捐款者質疑一啲有工開, 或者環境唔差嘅幕前藝人都有份受惠，變相分薄咗其他真正等錢開飯嘅基層電影人得到資助嘅機會; 又有指申請要求寬鬆，令人誤解以為係人人有份。
古天樂（東星娛樂）
梁思浩日前就喺佢嘅節目指黃夏蕙係擁有幾層物業嘅有錢人，但就走去領取抗疫基金，仲攞埋張支票喺網上炫耀。對此，黃夏蕙嘅契仔楊峰立即為佢護航, 楊峰指自從年頭開始，一直由佢照顧契媽嘅起居飲食及交租，夏蕙姨冇幾幢物業喺手。近10年夏蕙姨都係靠表演賺錢養活自己。
黃夏蕙與契仔楊峰（黃夏蕙Facebook）
楊峰指因為疫情，所有商戶表演及宣傳活動都停晒，契媽黃夏蕙近半年已經損失咗六位數字嘅廣告收入。平日契媽都唔會儲錢，有多餘錢就會捐畀老人機構同社區有需要嘅朋友，賺$10會將$6-7奉獻出社區，請梁思浩唔好胡亂猜測契媽嘅經濟狀況, 直斥梁思浩純粹係為咗網台節目嘅點擊，嬲到話除咗用粗口回應之外，諗唔到任何表達方式。
楊峰仲鬧梁思浩身為億萬富翁都冇為弱勢社群做事，非常激動地說：「饒恕我直言一句，發財必先立品！要做大公無私嘅審死官，必先將案情分析清楚才可審判！否則只會成為冤案, 正義將永遠沉在陰暗世界中, 財富只會好似過眼雲烟，轉眼即逝, 共勉之！」叫梁思浩收口兼道歉。
梁思浩（梁思浩Facebook）
梁思浩對於楊峰對嘅指控就不以為然, 他說：「我係對事唔係對人，所以就算見到黃夏蕙都唔會尷尬，我都有講陳庭欣同唐文龍會將啲援助金捐出嚟嘅事，唔通我又針對佢哋兩個咩?」
陳庭欣話自己知道自己合資格就走咗去申請，冇諗太多。（陳庭欣IG）
黃夏蕙今日都喺自己Facebook回應 ，佢指自己並冇物業，得一個「臭皮囊」！佢仲話今次思浩矛頭指錯咗對象：「點解我哋嘅特首只係救市唔救人？點解我哋演藝界嘅議員唔出聲幫我咃？點解我哋嘅財政司唔撥款畀演藝界同業？結果搞到演藝人協會出通告，我哋娛樂界幕前幕後嘅人，頓然變咗喪屍出籠，蜂擁而至去申請抗疫基金！我哋絕對冇錯！究竟錯喺邊度呢？」
（黃夏蕙Facebook）
黃夏蕙希望梁思浩唔好怪契仔楊峰嘅言詞，指契仔一向好緊張同好照顧佢老人家；佢亦明白梁思浩戥捐款者唔抵嘅心情。黃夏蕙最後更寄語：「呢個時勢, 唉......同舟共濟吧！」
撰文:黃蘊姿