去年4月爆出「安心偷食」事件轟動全城，男、女主角許志安和黃心穎因形象插水，叫停所有工作，安仔事發後，曾經在記者會上爆喊認錯，又認自己是一個「壞咗嘅人」，他接受全面停工靜思己過，連帶原本去年舉辦的紅館演唱會都取消埋。
事隔14個月，安仔終於出山復工，他獲邀為ViuTV音樂節目《Chill Club》錄影，吸引大批傳媒到場採訪，安仔表情有點緊張，但見到記者時都面帶微笑，而他手上有戴上婚戒，他率先開口主動發表感言：「好耐冇見，不如我講吓先，今日係寶麗金50周年特備節目，大會邀請我上嚟唱歌，所以我出現喺度。以前係正東（唱片公司），屬同系公司，好開心可以出嚟。經過呢段時間，自己嘅沉殿、靜思、反省同學習，覺得自己成長咗好多，呢段時間係有艱難嘅時候，當我每次面對返自己嘅起點喺邊度，就盡力向前看。今日呢個時間係適合時間，出番嚟去面對自己、面對群眾同社會，希望有呢件事發生，令我喺未來日子做得更加好，希望重新出發。」
相關新聞：【黃心穎繼續復出無期】許志安潛水一年多傳後日正式復出 獲老婆鄭秀文支持重新出發
(圖片：《晴報》林良明攝影)
(圖片：東星娛樂)
(圖片：《晴報》林良明攝影)
安仔透露停工這段時間，大部分都是留在家陪伴家人，亦有努力去裝備自己，有睇書同做運動，希望可以鍛鍊更好的自己，思考將來的路。他說：「今日係時候見大家，承擔返自己之前講過嘅嘢，就係要好好畀自己靜思己過，經過一年幾，自己裝備好重新出發。（全面復出？）唔敢講，依家疫情環境，諗都唔敢諗住，反而我著重係今日出返嚟同大家講我準備好，將來唔敢講，但我肯定嘅一點係我一定做得更好，復工嘅事交畀公司。」安仔直言今次獻唱露面之後，手頭上暫時未有工作安排，早前反而跟老友蘇永康偕慈善機構一齊落區派口罩，跟長者聊天的過程，反而令他有所反思和得著，他說：「往後日子除咗做好工作、照顧家庭之外，我都希望畀多啲時間關心社會。」
(圖片：鄭秀文IG )
(圖片：鄭秀文IG影片截圖)
(圖片：鄭秀文微博)
安仔直言今日再次面對傳媒，前一晚都難免緊張，他說：「太太（鄭秀文）同我講，做得呢個工作一定要100% Ready，心態要好正面，希望話畀人聽我呢一年幾嘅進步，係有少少緊張，因為見咁多人，但要勇敢去承擔同面對將來。（Sammi鼓勵說話？)又冇特別，叫我自然啲，對自己有信心。我除咗好好去修理自己之外，自己屋企隻狗Lucky老喇，呢排情況差都行唔到路，我喺佢身上學到珍惜，雖然係幾花氣力去照顧佢，但係值得，因為佢陪咗我哋咁耐，依家屋企幾個人輪流去湊佢，叫做係倒數嘅日子，希望佢開心。」
相關新聞：【安心偷食】喊到收唔到聲！許志安開記招：我覺得自己不知所謂
(圖片：黃心穎IG )
(圖片：黃心穎IG）
被問到有沒有聯絡黃心穎？安仔表示：「冇，以前嘅嘢都過咗去，希望大家畀時間我，我知要接受係要啲時間，我有好信心同自己講每一步會做得好，其餘嘅嘢由佢過去啦！我覺得對我嚟講係錯誤嘅傷痕，呢個傷痕唔會令我忘記，但睇到呢個傷痕我會更加警醒自己，過去係過去，唔會忘記，每次睇返，會提醒自己做得更好。」他表示這段日子要感激的人很多，得到家人、Sammi同朋友的鼓勵和支持，雖然老友鄧建明都有邀請他擔任演唱會嘉賓，但自己因未夠信心而婉拒，希望將來再有機會支持他。他希望今次公開見面盡力為自己挽回事業，希望假以時日讓大家看到他的努力。
採訪：倪小珊
責任編輯：楊安莉