近日安德尊上節目《詩情廿四味》做嘉賓，接受主持倪詩蓓的訪問。安德尊指自己剛入行時在亞視見過倪詩蓓，指當時對方已是「當紅阿姐」，雖然多年來唔多碰面，但仍很開心可在節目出現。
（圖片：大會提供）
倪詩蓓問他是否中英混血兒，他指不是，Junior Anderson只係名字，安德尊都是由英文名改來。他在1987年透過《第二屆未來偶像爭霸戰》而入行，當時他選唱哥哥《Stand Up》，「鍾意呢首歌，唱呢首歌打遍全香港歌唱比賽先有機會入(未來偶像爭霸戰) ，歌詞好密。當時跟戴思聰老師學，覺得比較適合參賽， 有表演性，勝算高少少。」在2000年安德尊更曾聯同「Gas!」組合合唱《董不董》並灌錄唱片，早年他亦開金口獻唱不少兒歌，較出名的如前期的《前進啊！Gulliver Boy》、《乖仔學堂》、《大王駕到》等。
(圖片：Big Big Channel片段)
(圖片：Big Big Channel片段)
倪詩蓓提到安德尊是曹達華乾兒子，不過安德尊就澄清曹達華是他師父。「當年的確想認佢做契爺，但萬梓良係佢契仔，又搵唔到佢，要徵詢佢同意，唔可以超越一啲規限，咁華叔就話做佢徒弟。」而倪詩蓓讚他參與很多慈善工作，更在2013年及2018年分別獲香港特別行政區授勳「行政長官社區服務獎狀」和「榮譽勳章」。安德尊就謙稱：「唔算慈善，只是跟人學野。獲榮譽勳章係偶然，多謝提名人，希望同社會上老友記開心下。」
（圖片：東星娛樂）
相關新聞：【元朗地王】安德尊發財立品樂捐酬勞做善事 初戀女友離世打擊至今未娶
兩人言談間又提到安德尊被傳是「廚師天敵」，過往他跟李錦聯師傅一邊煮餸一邊互罵的畫面，成為不少網友「剝花生」之選，倪詩蓓指他：「成日問好多問題令廚師滴汗，傳出『嗌的火花』。」安德尊就解釋：「有咩錯啲人會賴我，因為我係主持，所以我唔識緊係要問。不過個個廚師都係高手，即刻答到問題。流汗係因為佢哋煮緊嘢火爐熱，令到我好尷尬，人哋以為我成日蝦廚師，完全對佢地冇壓力，我先有壓力。」
(圖片：TVB影片截圖)
相關新聞：【曾效力無綫26年】李錦聯被主持封為「香港神之手」 離巢後工作不言休經營自家生意
安德尊入行多年，戴眼鏡着西裝形象深入民心。有傳言指他其實沒有近視，戴眼鏡只因風水使然。安德尊於節目中澄清：「我有400度近視。當時入行是80年代尾，嗰年代鏡片好厚又反光，以前燈好熱又會直射落鏡片度。個時新仔入行同伍衛國合作拍電視劇，燈光師話咁反光點打燈，有位前輩演員話冇戴鏡片咪得，覺得個諗法好聰明。自此之後以後就戴住個眼鏡框，佢哋唔使就我打燈。因為我近視，唔可以畀人知道我無近視，我戴隱形眼鏡係我嘅事。」
（圖片：東星娛樂）
安德尊表示自己是唱歌入行，當時報過新秀、無綫訓練班但最後去了亞視。「訓練班報名都要錢，無綫個啲訓練班貴，就去亞視。」他笑指自己是實力派。其實他也曾參演電影演出，如1992年的《危險情人》，「個時拍戲好開心，入行係我人生最大的希望，好有樂趣，無論收幾多錢都好願意係呢行貢獻我以後嘅日子，做到做唔到都會想做落去，所以幾多錢都會拍。但我記得拍《危險情人》都唔平，因為當時電影業蓬勃，就算係三四五六七八線都有啲錢。我最貴，貴在要被吊上五層樓，仲要爆炸，保險最貴。不過人生好得意，有呢啲經歷先可以走到今天。」
（圖片：東星娛樂）
（圖片：東星娛樂）
安德尊指自己已過了拍拖和結婚的階段，「我已經放鬆晒，不爭名逐利，我希望自己晚年開心。」他亦被問到會否擔心被誤會是同性戀？他笑指不介意，笑罵由人。
（圖片：大會提供）
（圖片：大會提供）
撰文：林惠珊
責任編輯：楊安莉