在《愛回家之開心速遞》入面經常在「尋寶圖」出口成文的豹叔（黎彼得飾），事實上是香港著名的鬼才填詞人，雖然他近年已經甚少再有新作品，不過他所填過詞的歌曲，至今都成為膾炙人口的經典流行曲。黎彼得近日接受香港電台節目《舊日的足跡》訪問，大談他當年被發掘的經過，他表示：「第一首歌係二次創作叫《傷心淚》，我將《相思淚》改詞，沒想到譚炳文在《歡樂今宵》演繹出來，大受歡迎，隨後第二隻真正創作的就是溫拿的《玩吓啦》。」後來，許冠傑透過朋友主動結識黎彼得，沒想到兩人一見如故，黎彼得說：「當時好似乞衣見王子咁，佢已經好紅，冇諗過原來佢有睇我專欄，叫我寫啲詞畀佢作歌，就推出《浪子心聲》呢隻歌，佢係我恩師。後來佢認為我唔應該做司機，介紹我去嘉禾同TVB做編劇，於是正式入行。」
相關新聞：【直播音樂會】許冠傑完騷回家湊孫吐四字感言 蕭潮順將課金全數捐通利員工
(圖片：《愛回家之開心速遞》電視截圖)
(圖片：大會提供)
黎彼得直言《半斤八兩》的歌詞他有份填，不過就沒有加他的名字上去，他說：「當時首歌早已成形，我只係幫佢潤飾一下，嗰啲『滾水淥豬腸』、『濕水炮仗』佢點會識吖！」他表示自己欣然接受，後來就跟許冠傑「兩為一體」在歌詞合作上擦出不少火花，問到為何合作七年後就再沒有作品？他說：「主要係輿論問題，大家總係覺得Sam總係掛名行頭，我黎彼得行後，其實我唔介意，難得有人畀我出名喎，其實佢冇必要出我名呀！不過佢覺得唔太好，於是分開寫，最後一隻合作係《紙船》。當然，唔多唔少會影響到友誼，事隔廿幾三十年都冇見面，連通電話都冇。」他形容跟Sam的關係就是分手情侶，兄弟情不能夠一廂情願，他笑言：「佢老婆都唔想我出現啦，因為我次次上佢屋企傾通宵，佢老婆都要獨守空幃，次次Sam都話老婆投訴，加上佢原本唔煙唔酒，同我一齊就學食雪茄、飲香檳，我算係少少損友啦，不過只係教佢享受人生啫！」
與許冠傑「分手」後，黎彼得原本打算封筆不再寫歌詞，後來黎小田邀請他為張國榮的《Ｍonica》填詞，成為他事業另一個高峰，黎彼得說：「我失戀都冇心機寫，點知黎小田催我交，於是我破格用快歌寫首Sad 歌。」
相關新聞：《愛回家》大四喜Rap出感動 網民推爆拎樂壇新人獎
(圖片：東星娛樂)
(圖片：東星娛樂)
黎彼得直言這個女友是一生最愛，之後就算結婚都是因為要負責任，根本不是愛，他說：「呢個女友好欣賞我才華，我亦好愛佢，一齊三年之後，佢屋企人覺得我冇前途，於是和平分手。直至39歲我太忙得到肝炎入醫院，出院費用20多萬，同年稅局又追我10多萬罰款，我冇錢到要賣樓。當時失業又冇錢，所以冇啦啦走去結婚，係唔相愛呀，不過叫做有緣喺埋一齊。」
囝囝3歲的時候，太太決定離家，當時黎彼得要工作未能照顧囝囝，只是交給家傭就返大陸工作賺錢，試過半年都沒回家，問到會否對兒子感虧欠？黎彼得說：「有，但真係冇辦法，要搵食，我同個仔有個共通點，就係又係一條友，同佢冇乜父子情，無仇不成父子，我同佢在心中。18歲時佢阿媽曾經想帶佢返去一齊生活，但相處一陣又頂唔住返我度。依家個仔30歲，喺南京讀中西醫今年畢業，至今都未搵過一亳子返屋企呀。正所謂：『家貧出孝子』，你想要家貧定要孝子？人生既然咁矛盾，就唔好諗咁多，坦白講，我今生無悔，小學未讀完就寫到咁多歌詞，最重要係將歡樂帶畀大家。」
(圖片：東星娛樂)
責任編輯：楊安莉