25歲嘅馮盈盈舊年年底同十優醫生男友Martin結束4年情，之後就好快高調「復牌」上市，仲喺《#後生仔傾吓偈》中欽點鄭衍峰做「男友」，盈盈出席活動時又大方表明鄭衍峰符合佢擇偶條件，二人嘅緋聞炒到熱哄哄。
馮盈盈與Martin（網上圖片）
不過日前盈盈被影到同賭王四房公子何猷亨前後腳去到深灣遊艇會，再轉場去兩艘逾億元嘅豪華遊艇開Boat Party。不過，原來盈盈當日並唔係單獨赴約，好姊妹江嘉敏同女性友人於淺水灣碼頭等駁艇上遊艇，江嘉敏一上艇即刻黐實盈盈，糖黐豆走勻遊艇識朋友。
（網上圖片）
盈盈被指同賭王公子發展戀情，不過佢火速否認，指佢哋絕對唔係發展中，仲話佢同猷亨係因為江嘉敏介紹先認識，純粹朋友關係，叫大家唔好諗多。
賭王何鴻燊日前離世，馮盈盈被問到有冇慰問對方，佢指同猷亨啱啱識，連對方電話都冇。不過話相信爸爸離開都會難過，希望猷亨可以節哀順變。盈盈話未感覺到對方追求，又話識朋友唔會睇錢，覺得最重要係心地善良同大家有冇話題，亦唔會太介意外界眼光。
另一緋聞男友鄭衍峰就指馮盈盈一早已經同佢「報定案」，話江嘉敏叫佢去Boat Trip，仲話江嘉敏喺Boat Trip介紹猷亨同埋其他朋友畀盈盈識。
（江嘉敏IG）
不過江嘉敏就大爆佢哋同猷亨早前已經食過飯：「我、YY（盈盈）、何生，仲有幾個朋友，六、七個人一齊食飯，除咗我同YY，其他都係圈外人，唔係Speed Dating，我真係冇介紹過任何人畀YY識，完全冇，從來冇，佢咁多人追，使乜我介紹！」江嘉敏話成班朋友食飯，冇留意到盈盈同何生過唔過電、襯唔襯。江嘉敏喺船P之後仲Post相話多謝盈盈邀請。
（江嘉敏IG）
咁問題就嚟喇，雙方各執一詞，呢個「富貴船P羅生門」事件中到底係邊一個冇講真話呢？
原來馮盈盈同江嘉敏嘅一個共同朋友都有喺Boat Party嘅翌日Post相，無獨有偶，佢都係話多謝盈盈嘅邀請，唔通盈盈係呢個「Boat Party」嘅女主人？
（IG圖片）
有指江嘉敏被指係介紹人而不憤「被拖落水」令佢同盈盈不和。盈盈就冇再解釋，想事件淡化：「我冇拖佢落水，我係畀船拖落水，點都好，因為牽涉其他朋友，最好都係唔好再講落去，令新聞早日平息。」
有網民笑指江嘉敏Post一張影到馮盈盈炒晒車嘅相「報仇」，不過江嘉敏就解釋佢手頭上得呢一張合照。（江嘉敏IG）
撰文：黃蘊姿