做成功男人背後嘅女人難，做一個成功偶像背後嘅女人更加難。唔少偶像都係Fans心目中嘅完美化身，Fans自不然都對佢哋嘅另一半要求好高，有啲Fans甚至會口出惡言，覺得佢哋襯唔起自己偶像。
以下呢幾Pair，有人經得起「世界將佢包圍」，但亦有人因此咁斷送咗一段姻緣。
林志穎
有「凍齡男神」之稱嘅台灣男星林志穎，帶老婆陳若儀（Kelly）及媽媽參與大陸真人騷《婆婆與媽媽》，節目公開佢哋夫妻及婆媳之間嘅相處方法！
（網上圖片）
模特兒出身嘅陳若儀婚後淡出娛圈，今次激罕公開亮相，喺節目其中一幕，佢準備出去話幫奶奶買衫，林志穎表示想一齊去，但陳若儀堅決拒絕，表示：「你去……我壓力很大。」
（《婆婆與媽媽》截圖）
陳若儀之後提到，「林志穎老婆」呢個身份畀咗佢好大壓力，仲講到梨花帶雨，我見猶憐。其實佢自從同林志穎相戀開始就一直被惡意指佢係「倒追」林志穎，即使林志穎曾表示對老婆係一見鍾情，陳若儀呢10年嚟受到嘅人身攻擊都冇停止過。陳若儀覆述：「長得醜啊、你憑甚麼嫁給他啊、你有甚麼才能啊、妳齙（哨）牙…就是各種人身攻擊，萬箭穿心。」雖然最困難嘅時間已經過去，陳若儀都係會不時諗起呢啲攻擊，令佢覺得非常不安，甚至後悔接拍呢個節目。
（《婆婆與媽媽》截圖）
幸好深明愛妻困境嘅林志穎就安慰對方要放鬆啲：「做自己就好，我們是要呈現給支持我們的人看的。」
宥勝
最近有網民批評宥勝太太長相似菲傭，宥勝發長文於網上反擊，自爆原來當初二人曾一度分手：「當初我決定選擇蕾媽（太太），被他們（親戚）那種困惑、鄙視甚至有點悲傷的眼神徹底撕碎…我跟蕾媽分手，非常快速的交了一位白富美，用一種幾近報復的方式回敬身邊的人…他們竟然一樣困惑地問着我：為甚麼是她？」
（網上圖片）
後來宥勝大悟，明白感情只要向自己交代，所以佢選擇返去太太身邊，結婚組織幸福家庭：「她知道我所有死脾氣、壞毛病，卻還願意在我身邊…她願意在我看不見的地方默默付出，卻沒打算跟我要任何回報…」佢亦反擊網民話佢太太唔靚：「我覺得蕾媽很美，沒為甚麼，因為就是她！」
（網上圖片）
黎明
當年黎明係香港嘅No.1偶像派，幾乎個個少女都幻想自己係「黎太」。而黎明同舒淇當年就傳因為拍《玻璃之城》撻着，不過二人「地下情」七年嚟都一直否認，有傳黎明因家人及粉絲唔鍾意舒淇曾拍三級片，致兩人最終走上分手之路，黎明更被傳喺99年為情自殺入院。
（網上圖片）
黎明幾年前上內地清談節目時罕有談及同舒淇嘅一段舊情。黎明被問到當年兩人分開係咪同外界壓力有關？黎明不置可否：「我是當事人，我不能再說，人家已經結婚了，再討論的話不好，無論用甚麼方法討論下去都不太好。」被問到這段情係咪算係最心痛一次？佢話：「每個人都會有痛，沒有痛就不可能會在一起。」黎明這呢個訪問引起極大回響，讚佢有「男人該有的胸懷」！不過二人嘅分手原因成為永遠嘅謎。
（網上圖片）
撰文：黃蘊姿