袁偉豪跟女友張寶兒拍拖逾兩年，二人不時在社交網貼出合照放閃，下周一（11日）是袁偉豪的39歲生日，他昨晚在社交網上載跟寶兒、胡蓓蔚及單立文為他慶生的相片，當中更有寶兒向他獻香吻的激罕合照，而袁偉豪亦有「回禮」送吻，兩人大曬恩愛；寶兒接受《晴報》訪問時，大爆4人飯局談話內容，坦言席間曾談到新居裝修問題，令人聯想到兩人快將「好事近」，她亦不置可否：「落實咗再話畀大家聽。」
（圖：袁偉豪IG）
（圖：袁偉豪IG）
港姐出身的張寶兒，入行後不久便跟拍拖7年的男友Jonathan分手，而袁偉豪16年則與拍拖三年的前港姐岑杏賢宣布分手，各自回復單身；直至17年，袁偉豪、張寶兒和楊明一起遠赴坦桑尼亞拍攝無綫旅遊節目《打工捱世界Ⅱ》，雖然袁偉豪和張寶兒是首次合作，但男方處處對她體貼入微，成功攻陷寶兒芳心；袁偉豪事後曾在訪問中透露，在非洲拍外景時，他靠信息「我要你做我背後的女人，你會點做？」試探兼示愛，寶兒的回答亦令他感到自己有機會，雖然回港後袁偉豪曾想「縮沙」做回朋友，但最後都不想抹殺這大好機會而放膽去愛，兩人拍拖至今感情穩定，且不時被催婚，袁偉豪直言已有結婚打算。
（圖：袁偉豪IG）
（圖：袁偉豪IG）
即將生日的袁偉豪，昨日在IG貼出女友寶張寶兒、胡蓓蔚及單立文為他慶祝生日的照片，眾人亦未有違反限聚令，四人一張枱，袁偉豪留言：「每一年的五月份都有大家跟自己一起慶生日，限聚令底下不能跟所有好友相見，但今年罕有地收到了一個生日香吻，既然如此，懂得社交禮儀的我立即還一個了吧。」相中見寶兒攬實男友獻吻，咀到鼻到扁埋，更開心得笑到見牙唔見眼，至於袁偉豪「回禮」鍚鍚寶兒時，則一臉陶醉的合埋雙眼，「閃盲」不少網民。寶兒事後留言謂：「沒有禮物，就這樣先吧。」還附上一個伸脷及怕醜樣的emoji。好多網民都叫兩人快點拉埋天窗，而圈中好友黃智雯、陳山聰、李施嬅及姚子羚等亦送上生日祝賀。
（圖：袁偉豪IG）
（圖：袁偉豪IG）
寶兒昨日接受本報電話訪問時，坦言今次生日飯局是即興約，她說：「其實我哋幾個成日都會食飯，今次都係臨時約，順便慶祝埋Ben生日。雖然因為限聚令唔可以太多人一齊食飯，但我哋傾偈反而可以傾深入啲。（你哋傾咩內容？）傾吓生活、工作、裝修屋企呀.....（準備結婚裝修新居？）er.....暫時都係咁......有啲咩新消息再話畀大家知，大家都好享受呢個階段嘅生活，多謝大家關心，我知道大家都好心急，但冇壓力嘅。」寶兒坦言跟男友有默契何時結婚，問到是否今年內拉埋天窗？她不置可否：「唔.....落實咗再話畀大家聽，今年工作都好忙，好感恩呢個時候有工作。」
（圖：袁偉豪IG）
呢張係上年慶祝嘅生日相
（圖：袁偉豪IG）
談到在聚會上向壽星仔獻吻，寶兒甜笑表示：「係呀，用住先，當係禮物。其實都好少咁公開（鍚鍚），依家紀錄低都好，見到幅相都開心嘅。（正日會再同男友慶祝？）佢嗰日有工作，但我都會陪住佢嘅，呢日點都要留畀佢。」認真sweet爆，希望盡快聽到二人的好消息。其實，有份出席飯局的胡蓓蔚在留言祝賀袁偉豪時，亦有祝他早日成家立室，未知是否有所暗示呢？
撰文：倪小珊