903 DJ麻利與「Do姐」鄭裕玲主持商業電台叱咤903 嘅《口水多過浪花》，身為DJ嘅佢聽盡唔同類型嘅歌，日前喺社交網站不點名咁指出一位公眾人物咬字唔正：「出嚟見人就要開口講嘢，開口講嘢就會露餡，咁學好啲廣東話，唔係第一件要做嘅事咩？希望大家知道，你影響嘅係下一代人。趁住呢排，好好學習咬字，好嗎？我肯教㗎，你肯唔肯學？（Sorry好嚴厲，但真係忍不下去。）」
（Mirror IG）
雖然冇開名，但就惹嚟一眾「姜糖」對號入座，紛紛PM麻利力撐偶像姜濤，其中一名粉絲更鬧爆，話佢哋全部「糖」都知係講緊姜濤，：「佢唔需要唱歌咬字正都可以好紅！唔該唔好再單打佢，濤濤只係一個小朋友！」
（麻利IG）
麻利隨即喺IG限時動態上還擊，表示自己並非針對一個人:「咬字唔正嘅問題，根本好多歌手唱咗十年都係咁，我冇開名就係因為我唔係講佢，亦唔單止只會講佢。」，又謂:「會唔會係你哋自己都知道自己偶像有懶音，全部走嚟對號入座？」
（東星娛樂）
姜濤一向話題性十足，事件隨即喺討論區引起廣泛討論，有人指姜糖盲撐姜濤，仲拎21歲出道嘅歌神陳奕迅同現年21歲嘅姜濤比較，指年輕並唔係藉口。
一石激起千重浪，姜濤之後都出咗一個限時動態，謙卑咁表示自己會努力改進。（姜濤IG）
麻利事後都有喺自己嘅Live提到自己私下都有搵姜濤，叫佢唔需要為呢件事唔開心，另外仲有好多姜濤Fans代嗰名態度唔係咁好嘅「姜糖」道歉，但麻利就表示冇呢個必要。
（麻利IG）
麻利之後再喺IG Story安撫姜濤其他粉絲，並指姜濤係上進嘅藝人：「我梗係知大部分姜糖都係識得乜嘢係正確啦，大家唔使咁緊張，我唔會因為任何人嘅行為影響我對姜濤嘅觀感，大家都係成年人嘛。如果姜B係受保護動物就大件事啦，好彩佢都係一個緊張自己事業，努力不斷進步嘅人啫。」
（麻利IG）
撰文:黃蘊姿