7-11推「同心互助」飯券認捐 為5間非牟利機構籌集飯券

各行各業人士都受到新冠肺炎疫情嘅影響，唔少人可能被迫減薪又或放無薪假，甚至失業，基層家庭更加係手停口停。黛安知道，7-Eleven為咗幫助有需要人士，昨天推出咗「同心互助」飯券認捐活動，目標係籌得70,000張飯券，送畀5間香港註冊的非牟利機構，一齊為基層送暖，真係好窩心啊！

想參加今次飯券認捐活動好簡單，只要到門市認捐每張$15嘅飯券，即可憑收據上嘅二維碼到網站選擇捐贈機構；活動完結後7-Eleven就會將收集到嘅飯券送到5間非牟利受惠機構，再轉贈有需要人士。受惠機構包括北河同行、膳心連基金、香港基督教服務處、惜食堂、聖雅各福群會眾膳坊。

其中喺深水埗紮根多年、北河同行負責人明哥陳灼明同黛安分享，疫情至今多咗唔少區外人士尋求協助，當中唔少係學校主動聯絡佢，希望明哥可以幫到因雙親失業、有經濟困難嘅學生。眾膳坊代表亦表示，對受助人嚟講，攞飯券唔同排隊等派飯，可以多一份尊嚴。呢個活動咁有意義，大家要多多支持呀！