英皇藝人蔡卓妍（阿Sa）、鍾欣潼（阿嬌）以及關智斌（Kenny）由馬來西亞返港後要進行家居隔離14日，對於平時日日都咁忙嘅佢哋嚟講，相信真係悶到發霉！
關智斌連日嚟都Post咗啲自己喺户外踩單車同電單車嘅短片，唔通佢唔理隔離令偷走？原來佢只係開咗個背景Video加單車機，令佢喺屋企都可以好似置身喺户外踩單車同揸電單車咁。娛樂性就夠晒，但阿Sa忍唔住留言笑佢自從有咗精神病之後個人精神咗好多，而霍汶希就問佢係咪困到個人癲咗，仲有粉絲話佢經過呢14日之後可以改行諧星路線。
(Kenny IG)
(Kenny IG)
其實Kenny好有責任心，即使今日完咗隔離令佢都表示會繼續自我繼續隔離多一段時間，話係為人為己、減輕醫護負擔，不過佢就特登打扮，喺屋企自己一個開Party，好識得自娛呀!
Kenny於Joey IG 留言。
關智斌一個人的派對。(Kenny IG)(Kenny IG)
不過人又點可以冇社交生活，尋日阿Sa同祖兒都分別Post咗佢哋隔離最後一日開video call party嘅相。
(Joey IG)
阿Sa話佢哋又傾心事又做運動，一傾就傾咗兩個鐘，感情超好，不過Kenny就忍唔住打喊露，阿Sa留言:「男人真係冇咁鍾意煲電話粥#點解我哋成日都有咁多嘢傾 #話題源源不絕。」
(阿Sa IG)
阿Sa於Joey IG留言。
Joey都Post咗佢哋一齊拉筋做運動嘅相，不過Focus擺咗喺關智斌嘅筋骨度，大家都發現佢拉筋時比起Joey同Twin雙腳係曲晒，動作唔合格！雖然已經一次集齊幾個英皇紅星，不過大家都未滿意，個個留言問「張敬軒去咗邊？」唔知佢哋會唔會順應要求開個video call live呢？
(Joey IG)
撰文：黃蘊姿