林保怡（Bowie）首次監製及主演ViuTV劇集《歎息橋》，Bowie近年成立自己嘅製作人公司，實行自己劇集自己拍。
（林保怡微博）
Bowie已經好耐冇劇集喺香港播出，今次仲要做埋監製，佢坦言都有壓力。劇集除咗賣畀ViuTV之外更賣去內地作網上播放，3月28日便正式首播。保怡一早已經進軍大陸市場，佢指咁做係有意幫ViuTV打入大陸市場：「希望可以真係進軍到一個咁大市場，係一件開心事。」
（網上圖片）
此舉粉碎保怡拍攝ViuTV劇集《綠豆》後同ViuTV關係惡劣嘅江湖傳聞：「我同ViuTV關係好到其實一年食一次飯，同埋我哋唔係ViuTV演員，只不過將部劇賣畀佢。」《歎息橋》一劇搵嚟好多實力派演員，包括周家怡、秦沛、伍詠薇、黃文慧等。除咗一眾老戲骨之外，保怡指自己都會幫助新人：「《歎息橋》我都畀好多自由好空間畀新朋友去演繹角色，我同兩位導演喺旁邊睇住，但都真係出問題先出聲，不過大部分人都OK，演得好好。」
（林保怡微博）
2011年，Bowie毅然決定放棄無綫一哥嘅地位離巢北上內地發展，有傳當年佢被無綫冷待促使佢離巢。
Bowie喺無綫拍落好多經典劇集！（《大時代劇照》）
《金枝慾孽》劇照
《鑑證實錄》劇照
《天與地》劇照
Bowie澄清純屬誤會:「TVB是一個很安全地方，不受風吹雨打的『玻璃罩』，其實大家(演員)都喺度跳彈牀，大家都好想愈跳愈高，想增加工作及知名(度)，但當時我覺得自己到了頂點。」Bowie當時諗，未來嘅歲月係咪繼續咁樣落去？佢希望突破自己，所以選擇離開。
（東星娛樂）
日前Bowie同拍檔周家怡為大陸網站直播節目《好好吃飯》下廚煮幾味，節目中Bowie喺一個住家環境下廚，保怡邊下廚邊介紹呢間屋，指空間雖小環境幾靚，認為呢種簡單就是美。大陸傳媒因此誤以為該處係保怡寓所，更傳他經濟出問題，淪落住「蝸居」！
（網上圖片）
其實Bowie經濟完全冇問題，除咗早年喺大陸密密拍劇收入可觀外，佢亦有將資金做保本投資。Bowie早喺2017年於西貢買咗大屋，仲有花園畀佢嘅愛犬阿水走動：「其實間屋係節目組幫我搵嘅，梗係唔係我自己屋企，喺節目度我係介紹過間屋嘅陳設，但我從冇講過係我屋企，唔知點解會出誤會，我兩年前已經喺西貢買咗間近海望山嘅屋啦！唔知點解會令佢哋覺得我處境咁慘！」
撰文：黃蘊姿