保良局綫上挑戰 做運動即可行善

黛安同大家一樣好關心新冠肺炎發展，平日會多做運動，提升個人免疫力。聽公關姊妹分享，保良局啱啱推出「保良局2020VS綫上挑戰」第二階段，鼓勵市民即使留喺屋企都可以多運動；上載運動時數更可化成愛心，捐助畀保良局嘅服務受眾，非常有意義。

今次全新主題係「隨時動‧樂」，將運動與行善透過科技結合，希望市民可以全天候運動。保良局馬清楠主席同黛安講，運動好處多，除咗有益身體，運動過程中更可令身體釋放安多酚，對心智發展都有好處。保良局除咗喺學校及服務單位推動唔同運動計劃，亦鼓勵員工多行山同埋打羽毛球等，期望為社會帶嚟正能量。

公關姊妹仲話，保良局亦推出「全天候運動教室」，以一系列短片示範在家和戶外都可以輕鬆完成嘅運動。有關愛心捐助參加辦法詳情，可以瀏覽https://vs2020getmoving.plk.org.hk。呢個活動有雙重意義，黛安會勤力做多啲運動兼做善事，希望大家多多支持。