星級父母為子女「避炎」各出奇謀 黃浩然陪兩個囝囝睇《法證IV》解悶

新冠肺炎疫情持續擴散，本港確診個案勢必超過100宗，估計未來日子難免再有市民「中招」，絕對是人人自危；因受疫情影響，全港學校繼續停課，一班星級父母為了子女突如其來的假期，都絞盡腦汁給他們安排節目及「放電」。黃浩然昨日就一家四口前往行山，呼吸新鮮空氣，更與囝囝一同收看自己主演的《法證先鋒IV》解悶，絕對是最佳的「避炎」娛樂。

在熱播劇《法證IV》中飾演高級化驗師的黃浩然，近日因疫情關係，反而有更多時間陪伴太太和兩名八歲及六歲兒子，他透露這段期間一家人會在家中做運動，而昨日趁有好天氣，更齊齊上山走一趟，黃浩然表示︰「兩個仔因為停課關係，目前都係要網上授課。其實幫兩個仔打發時間比較頭痛，始終喺屋企好多引誘，有時小朋友會覺得好悶，所以最近都放寬畀兩個仔同我一齊睇《法證先鋒IV》，佢哋睇得好開心。」

作為家長，黃浩然坦言在疫情未明顯受到控制之前，都不想讓小朋友上學，他表示︰「始終兩個仔仲細，如果唔睇住，佢哋會捽眼耳口鼻，甚至除低口罩。雖然好擔心，惟有盡量做好自己。」

此外，他亦很關心冒着生命危險上前綫抗疫的醫護人員，黃浩然說︰「最近睇《星期日檔案》，見到醫護人員付出好多，甚至一些對疫情唔太樂觀的醫護更寫定遺書，所以呢段時間（我哋）會減少出外，亦盡量減少聚會，一切都從自己做起，其實我哋做的都係好皮毛，醫護人員比我哋更加辛苦。至於防疫物品，暫時都有足夠儲備，唔需要周圍撲口罩，為免浪費口罩，可以唔出街的話，都盡量少外出。」

黎諾懿：帶囝囝去郊外放電

育有快將三歲兒子黎峰睿（小春雞）的黎諾懿，反而不想囝囝被困在家，他每當不用工作時，都必定帶囝囝遠離煩囂，他表示︰「我會帶他去郊外，之前去了淺水灣沙灘，稍後計劃去農莊，主要去一些不太人多的地方，讓他放電。同埋，好彩我哥哥一家和我們住得很近，他的三名小朋友經常上我家玩，四個小朋友一起玩就不會太悶。」黎諾懿又強調，每次外出都會做足防疫措施，戴口罩和用搓手液消毒雙手。

葉翠翠：上落車前消毒雙手

剛於上月誕下第三名兒子的葉翠翠，仍未坐完月已偷偷地「出關」，日前一家五口到沙灘避疫。雖然疫情仍然嚴峻，但翠翠對於三名兒子的日常生活，顯得處之泰然，她表示︰「大仔同二仔都仲係好細，佢哋唔太知道防疫是甚麼一回事，所以都只係同平常一樣留在屋企玩。我哋都會如常外出，但會去一些人流較少的商場、食肆和公園，當在商場推門或上落車時，都會用酒精消毒雙手。日前我們去一間酒樓吃晚飯，只得三枱食客，很冷清。（外出食飯不擔心碗筷衞生問題？）我反而覺得現時某些食肆的衞生意識提高了，好像我們上次在酒樓吃飯，侍應拿碗過來時，表示已替我們用滾水燙了碗，讓我們很放心。」

譚俊彥：仔女停課陪伴溫習

與內地演員太太任祉妍育有一子一女的譚俊彥，透露最頭痛是子女的復課日子一再延期，而且他們的作息時間亦被打亂了，他表示︰「佢哋平日返學前一晚都會早些瞓覺，依家每晚好夜都唔肯瞓，我真係幾頭痛。其實在一些家長group入面，有些家長都好擔心，仲計劃幫個仔退學，不過我覺得暫時（子女）唔使退學，我亦都完全接受學校網上授課嘅安排。依家每晚我和太太都會同兩個小朋友溫習，好彩佢哋暫時都無乜投訴。」而不用開工的日子，譚俊彥會盡量陪一對子女溫習和玩耍，現時他希望疫情盡快過去，讓小朋友可以回復正常的學校生活。

吳若希：滿意學校網上授課

吳若希女兒「淼淼」目前就讀學前班，但因疫情關係而停課，吳若希表示︰「如果我喺屋企都會陪佢玩，有時會帶佢去人少的公園唞下氣，畀佢放下電。」至於囡囡就讀的學校，現時已改為Online教學，吳若希透露︰「每日老師就會在網上授課，學校亦會畀學生透過一個手機App，讓幾個小朋友組成一組學習，大約每組有七個人，呢種方法我覺得都唔錯，因為小朋友學習到之餘，亦可以同同學仔見下面。不過我最擔心係，如果我不在屋企，或者老公都返咗工，就無人陪個囡Online上課，擔心跟唔到進度。其實呢段時間個女都OK，反而做家長的真係會有少少壓力，所以學校安排得好，其實有好大幫助。」

撰文︰Pat、Pauline

編輯︰黃寶恩

美術︰梁政敏