武漢肺炎疫情不斷擴散，全城口罩短缺，唔少人都選擇留喺屋企活動，避免去到多人嘅地方之餘仲慳番個口罩。不過日日「吽」喺屋企啲時間真係唔知點樣打發，留喺屋企避「炎」嘅黃翠如呢日就化身大廚玩煮飯仔，但係出到嚟嘅結果真係唔知佢係消磨時間家定消遣佢老公。
相關新聞：黃翠如最憎Gel甲天生十指纖纖 呢個女星靠戴手套揚長避短
黃翠如煮嘅雞翼燶晒....(圖片：黃翠如IG）
黃翠如話係睇蔡一傑煮食頻道先下定決心整雞翼。（圖片：蔡一傑《傑少煮意》頻道截圖)
明明蔡一傑整嘅雞翼好成功，點解翠如會搞成咁？（圖片：蔡一傑《傑少煮意》頻道截圖)
事緣係翠如見到蔡一傑教整雞嘅片段，就心血來潮想挑戰整煎雞翼。不負「地獄廚神」之稱，翠如喺社交網曬出嘅製成品全部都黑過鑊撈，佢都忍唔住自嘲「聽說大家待在家的日子，很多女士都變成廚神。我也一盡點綿力......不知是火出了問題，雞翼出了問題，還是燈光出了問題，黑了一點點。好吧，仍需努力。正所謂，好又一餐，唔好又一餐。」
翠如話再接再厲，但蕭正楠話想轉食齋。（圖片：蕭正楠IG)
有Fans回應話黑到以為上面係一堆髮菜，仲有位朋友大爆翠如老公蕭正楠講過佢最叻只係整即食麵，認真失威！但蕭正楠留言賣口乖氹老婆：「黑咩？點解我睇唔到嘅？」翠如應老公話「聽日再煮」，嚇到蕭正楠急轉軚表示「聽日食齋」，兩公婆互動好可愛。翠如就食好啲增肥，但另一邊廂余香凝就留喺屋企都做運動減肥。余香凝話自己肥咗超過十磅，想減磅減到110磅左右。本身去健身室都有啲怕怕，事關上海有幾宗武漢肺炎確診案例係喺健身室傳染。好采余香凝屋企有健身單車，唔出街都可以日日做運動啦。
相關新聞：【老婆廚房】黃翠如獨沽一味餵飽蕭正楠 江若琳「膽固醇」餐老公爆笑：咩料？
(圖片：余香凝IG)
(圖片：余香凝IG)
唐詩詠較早前已經透露過自己屋企口罩短缺，所以決定盡量唔出街慳口罩。而佢呢排就係靠煲韓劇《愛的迫降》嚟消磨時間，意外被男主角靚仔韓星玄彬「圈粉」成為「玄太」，佢仲喺自己社交網大sell呢套劇添留：「韓劇嘅劇情都有好多反駁位，不過佢好似有種魔力，可以令你活係幻想之中，玄彬實在太溫暖，孫藝珍實在太可愛，《愛的迫降》把我逼瘋了。」詩詠仲同Fans互相留言話唔好爭「老公」玄彬添。詩詠少女心大爆發真係好可愛呀，不過好姊妹翠如見到佢咁瘋狂都忍唔住留個emoji公仔，非常搞笑。
唐詩詠似乎被韓劇迷住。(圖片：唐詩詠IG）
(圖片：唐詩詠IG）
撰文：黃蘊姿