資深演員韓馬利去年8月底在社交平台上自爆因患腦膜炎，在醫院中跟死神搏鬥兩星期，出院後在家休養一段日子才正式復工。現時65歲的韓馬利經歷過從鬼門關口被救回來之後，直言感觸良多，也讓她體會到丈夫杜燕歌對她無微不至的愛護，她願意放下自己的執著，不忙不急，好好享受跟他共度的日子。
韓馬利回憶起當日發生的一切，非常模糊，因為當時意識已經不太清醒，她說：「當日我要去內蒙古工作，坐飛機時已經唔太舒服，唔算太嚴重，係少少發燒發冷咁，返香港之後，老公見我未退燒，就叫我去看醫生，佢幫我搞入院手續，仲叫護士畀張輪椅我，準備推我上房，點知我一坐上輪椅之後就已經斷片。」她表示昏迷的一星期入面，她完全失去意識，直至蘇醒的時候，身上已經插滿喉管。
她說：「當時我第一件事拎起手機，見到好多信息，好想覆，但死喇，個電話點用呀呢？我竟然連個電話都唔識用。醫生問我知唔知一度好危險，一隻腳踏入鬼門關，佢話：『你可以係醒唔返呀！』慶幸留院期間病情有進展，休息大約三個多星期就出院。」
相關新聞：韓馬利腦膜炎險死體重暴跌7kg 情緒病復發無法進食狂冒冷汗
(圖片：《晴報》羅灝駿、潘卓忻攝)
韓馬利死過翻生，但復康之路並不是如期的順利，她形容當時有種說不出的辛苦，令她完全體會到病榻之中的那份無助，她說：「病情好反覆，今日可能狀況好好，聽日又可以跌到好低，所以個人情緒起伏好大。特別係因為個腦轉得慢咗，全力又總係冇乜力咁，控制唔到自己，後來演變成唔係體力嘅問題，原來係抑鬱。」她形容當時出現負面情緒，朋友勸不要亂想，但根本是自己不能自控的，那份病人的無助，她完全感受到。
(圖片：《晴報》羅灝駿、潘卓忻攝)
在復康的過程中，老公杜燕歌全程都陪伴在側，由於腦袋活動較以往的慢，要努力復健才能重回正軌。細心的杜燕歌除了購買貴價的補品，親自為韓馬利燉湯之外，還特別購買棋子、拼圖等康樂玩意，希望為韓馬利解悶之餘，亦可以讓她好好多動腦筋。以往性格焦急的韓馬利總是衝鋒陷陣走在前面，在病榻的過程中，她不得不慢下來，生活大小都依靠老公。
「今次我先真正明白到，我老公係個咁細心嘅人。結婚三十年喇，佢從來未試過咁對我，我一出汗，佢就幫我換衫，後來怕我攝親就改墊毛巾，濕完就換，唔想我再病。佢事事都為我諗得好細緻，原來佢係可以好細心，只係佢唔願意做出嚟。」
韓馬利直言，雖然旁人眼中他們是恩愛夫妻，但其實自覺對他很大的虧欠，原本以為煮好飯、整乾淨家居，不讓對方操心，就完成做太太嘅責任，做100分太太，但一直在各方面都忽略了他，久而久之關係就會疏離。她說：「好開心藉今次嘅病，令我睇到自己嘅不足。我應該作出補償，盡量做一位溫柔嘅太太，事事讓佢嚟作主，講說話速度放慢啲，大小事由佢嚟做決定，多啲為佢設想。」
相關新聞：老公杜燕歌心痛愛妻韓馬利似「公仔」盼望︰「希望佢可以同我嗌交﹑駁嘴」
(圖片：韓馬利微博)
(圖片：韓馬利Facebook）
（圖片：韓馬利Facebook）
（圖片：韓馬利Facebook）
此外，韓馬利表示生病之後，身邊的朋友都紛紛送上食譜、保健食品等等，讓她大感溫暖，她說：「毛舜筠每日開車車我去覆診，佢仲特地去買無激素嘅烏雞煲湯，送去我屋企畀我喝，我實在覺得唔值得咁多人疼愛。」幾年前患上焦慮症，韓馬利深明原因是自己太著緊工作，令整個人崩緊，她說：「今次生病之後，我希望可以重新安排生活，好好分配時間畀家庭、教會侍奉，工作等等，人唔可以冇工作，但工作唔係我嘅全部。」
多次被情緒病困擾，今次再一次大病重生，韓馬利鼓勵患病的人：「千祈唔好覺得係末路，一定有希望。有朋友的話，好好同佢哋分享，因為每個人嘅鼓勵，對你嚟講都好重要，任何事都唔係必然，當你每天都有生命、有氣息，應該存有一夥感恩的心。咁就唔會覺得自己苦，情況並非去到最差，所以最重要抱有希望。」
(圖片：《晴報》羅灝駿、潘卓忻攝)
（圖片：韓馬利Facebook)
(圖片：電視截圖)
撰文：楊安莉
場地：iDance HK