必搶限定產品 LEGO生肖跑主題 「鼠」到朗豪坊

鼠年將至，又係時候物色最啱feel嘅賀年禮品，送畀親朋好友。講起鼠鼠，大家都知道佢哋係大自然最佳跑手，黛安細個嗰時養嘅寵物倉鼠，閒來無事都最鍾意跑下「健身輪」，難怪係十二生肖傳說入面，鼠鼠都係最快跑贏其他生肖嘅冠軍。今年朗豪坊就同LEGO合作，用咗呢個神話典故做農曆新年布置主題，多個LEGO人仔會用唔同生肖造型現身，喺商場4樓至12樓玩「生肖跑」同過河挑戰，實行同大家「沖喜」！

黛安聽朗豪坊公關姊妹講，農曆新年布置會由本月8日至2月9日展出，同場嘅期間限定LEGO店，仲會推出每年新春必備嘅「新春限定別注版LEGO」，LEGO迷打完卡仲可以去掃貨，黛安就睇中咗「80105新年廟會」限定盒裝LEGO，因為買完可以即刻同場內以1︰25比例嘅「放大版」廟會場景合影，用嚟打卡夠晒趣緻。另外，隱藏版嘅樂高開運桃花都好吸引，要限定係朗豪坊LP CLUB會員先換到㗎，真係非常罕有，值得珍藏。

講起新年，梗係唔少得派利市啦，今年朗豪坊都推出咗「福鼠Say Cheese利市封禮盒」，利市封有紫色同橙色，夠晒高貴喜慶，仲有「芝士」造型嘅本地天然手工皂送畀大家，想要就記住早啲去換喇。

利市封禮盒換領詳情

換領日期︰8-24/1

換領方法︰LP CLUB會員即日消費滿2,500元可免費換領（每人每日限換1套）