6歲港產小畫家 平安夜畫作奪全球金獎

香港小朋友都好有創作天份，黛安聽聞年僅6歲嘅港產小畫家陳溥治，最近喺立陶宛「第16屆斯拉夫尼克國際兒童及青少年藝術大賽」中，憑一幅名為《平安夜的祝福－Silent Night》畫作，擊敗來自立陶宛、瑞典等全球共21個國家及地區，3,892名18歲或以下兒童及青少年藝術家，奪得「全球金獎」最高殊榮，仲刷新比賽舉辦16年來，年紀最小嘅中國及香港金獎紀錄。

得獎作品現正喺立陶宛藝術博物館展出，仲會印製成優秀作品年鑑，畀全球藝術博物館、教堂同院校進行文化藝術交流。另外，溥治仲有一幅畫作喺韓國「第85屆世界兒童美術大會」中，奪得「最優秀賞」最高殊榮，成為比賽中最年輕中國及香港得獎者，黛安都覺得佢好叻啊。