全港首個消化系統體驗展 齊認識人體奧妙

大家歎美食就歎得多，有無諗過食物食咗落肚，之後會去咗邊呢？黛安收到風，最近九龍灣MegaBox正舉辦全港首個消化系統體驗展，呢個名為「人體消化大冒險」嘅體驗展，集齊好玩同教學於一身，一眾大人小朋友可化身為唔同食物，勇闖3米高嘅巨型嘴巴，由口腔開始進入消化系統甚至變成「便便」，最啱小朋友邊放電邊學習。

今次展覽主要劃分為7大主題區，按人體消化系統嘅程序區分，首先可以「變身」做食物，行入巨型嘴巴「口腔與食道站」，了解當中嘅相互作用；然後「咕嚕咕嚕」咁跳入虛擬嘅胃部波波池「胃站」，然後仲可以去到「小腸站」、「大腸站」等等，一齊穿越長長嘅小腸隧道，感受消化液、消化球嘅「攻擊」，再經過迂迴曲折嘅蠕動隧道，終於到達「便便區」，仲可以大玩「便便」長滑梯，以最佳姿勢沖入馬桶，過程好有趣㗎！

除咗可以人性化咁體驗之外，現場唔同部位嘅互動展區亦會有大考體能同智力嘅遊戲及文字圖像關卡，分析每個部位嘅身體機能，仲特別用咗唔同物料模仿消化系統內各個部位，好似小腸絨毛、消化液等，激發參加者嘅好奇心，再由現場工作人員講解，等大小朋友都可以更了解消化系統嘅日常運作。

另外仲有好多色彩繽紛嘅打卡位，好似巨型馬桶、便便飛船等，好玩得嚟又學到嘢，啱晒親子一齊去玩樂啦。

「人體消化大冒險」體驗展

展期︰18/12-29/2/2020

地點︰九龍灣MegaBox 13樓

時間︰星期一至五︰1︰30pm-7︰30pm 星期六日及公眾假期︰10︰30am-8︰30pm

門票︰$78-$98

*每次體驗時間約60-70分鐘