香港迪士尼全新美食明年登場 星戰爆谷桶 小叉慕絲杯

2020年即將來臨，黛安噚日獲邀去香港迪士尼樂園，率先預覽樂園新一年餐飲活動。原來過去一年，樂園銷情最好嘅美食，係卡通角色造型雪條、爆谷米奇窩夫等，而兩間提供自助餐嘅餐廳，包括翠樂庭餐廳及米奇廚師餐廳，一共賣出超過1.7萬個生日或周年紀念蛋糕，數目非常多！

樂園現正推出以聖誕及電影《星球大戰》為主題嘅爆谷桶，配合節日同電影熱潮。

仲有卡通三眼仔造型嘅綠茶芒果慕絲蛋糕，加上《反斗奇兵4》新寵-小叉嘅特濃朱古力慕絲杯配鮮雜果，食得又睇得，黛安見到都忍唔住「相機先食」。

黛安同樂園度假區餐飲營運總監黃慶龍傾開，佢話過去半年樂園嘅本地客群都有所增加，今年聖誕檔期樂園餐飲訂座情況理想，有信心今年嘅餐飲入座率同去年相若，樂園餐飲團隊未來亦計劃舉辦茶藝班，希望吸引更多本地客到訪。香港迪士尼現時餐飲團隊有近2,000人，負責樂園及三間酒店內共20間餐廳嘅服務，為大家提供多達1,000款美食㗎。

除咗小朋友可享受樂園設施及美食外，老友記入場都有優惠！香港迪士尼喺今年9月至11月期間就推出咗長者優惠，65歲或以上持「長者咭」人士，可在3間酒店指定餐廳以最高折扣65折，享用自助午餐。樂園話呢個優惠吸引到唔少家庭客群，平均一個長者可以帶動約4名家人享用自助餐，同時帶動收入係預期嘅4倍。