華懋兩高層出馬 體貼為員工送餐

員工係公司重要嘅資本。黛安聽公關姊妹講，華懋集團執行董事兼行政總裁蔡宏興（Donald）同營運總裁王弘瀚（HH），噚日就現身員工飯堂，親自為職員送上「是日午餐」，真係非常有心。

呢個三餸一湯嘅菜式，除咗有炒椰菜、番茄炒蛋，仲有炸雞髀，好有「住家飯」嘅味道。公關姊妹仲話，職員去到飯堂見到兩位高層「微服出巡」送午餐，都好驚喜，個個都讚佢哋夠貼地又體貼員工。一位喺集團工作5年嘅員工就話，可以同Donald同HH近距離接觸及對話，機會好難得！

兩位高層派完飯之後，仲坐低同員工一齊食飯同傾偈，了解員工對飯堂嘅意見。今次佢哋兩位身體力行服務員工，係希望藉呢個機會同員工拉近距離，仲期望以身作則，推動華懋重視嘅「以人為本」精神，實踐Serving Leadership嘅領導概念，真係用心良苦啊。原來華懋成立近60年來，一直都有為員工提供免費午膳，希望營造家嘅感覺，公司咁體貼員工，大家做嘢都開心啲啦！