《多功能老婆》黃浩然賤男上身拋妻棄子 真黃太怒哮：點解去到咁絕

黃浩然近日在無綫熱播劇《多功能老婆》演活賤男劍雄，劇中的他日前狠心拋下太太及囝囝，重回顏總（于淼）懷抱，情節虐心，就連現實中的黃太Kaka亦在IG發文鬧爆老公。很多絲打痛斥劍雄太負心，睇到眼火爆；有觀眾亦指黃浩然的演繹好乞人憎！

楊千嬅、周柏豪及黃浩然主演的《多》劇，播映至今話題不斷，繼千嬅飾演的藍飛早前狂曬影后級演技派洋蔥後，日前黃浩然飾演的劍雄從北京返港，霸氣回歸舊公司攞彩，並返家與太太藍飛短聚，但隨即趕在凌晨12時重投顏總懷抱，狠心拋下妻子及囝囝，令女性觀眾震驚不已。

該幕戲就連視后胡定欣亦睇唔過眼，竟在浩然的IG留言︰「我想講粗口。」認真誇張。至於浩然現實中的太太Kaka，亦出Po鬧老公，她在IG發文︰「喊完之後，我心情沉重咗幾日！我終於忍唔到！明明好好，但點解一個人可以為咗自己去到咁絕？」

黃太出Po為千嬅加油

Kaka並稱︰「人性唔係本善咩？尚劍雄（黃浩然）！你令我開始懷疑同好擔心，你究竟係一個咩嘢人！你哋明白我依家嘅心情嗎？」她特別在文尾配上一堆流淚公仔，更hashtag#藍飛加油，看來黃太亦是《多》劇的忠實粉絲。一班網民都齊齊幫口，怒轟黃浩然的演出賤到出汁；有觀眾亦聲言一路睇一路喊。

不過，現實中的黃浩然卻是顧家暖男，經常在IG發放一家四口的家庭生活照，他與Kaka亦剛剛慶祝結婚14年，更特意發相放閃，相信這對老夫老妻會像浩然所講，能夠「一起走一輩子」。

撰文︰Steven、Pat

協力︰Crystal

編輯︰黃寶恩

美術︰梁政敏